OCTOBER 26, 2022 | UPDATED: NOVEMBER 22, 2022
RUSSIA

YASONO—KHOTI LATI MUBALI WALI NA MULANDU | “Na Wovwiri wa Chiuta, Ningazizipizga Chilichose”

JULANI

Pa November 21, 2022, Khoti la Asha ilo liri ku Chelyabinsk llikati Mubali Andrey Perminov wali na mulandu ndipo likati waleke kusangikaso na mulandu unyake kwa vyaka 6. Pasono ŵamujalirenge mu jele.

Nyengo

June 11, 2021

Nyumba 5 za Ŵakaboni ŵa Yehova, kusazgapo na nyumba ya Andrey zikasecheka mu misumba ya Asha na Minyar. Ŵamazaza ŵakapoka vinthu vinandi vya Ŵakaboni aŵa
November 10, 2021

Wakakanizgika kwenda kufuma mu chigaŵa icho wakakhalanga
April 27, 2022

Ŵamazaza ŵakati nayo wali mu gulu ilo likuchita vinthu vyakofya ndipo zina lake likaŵikika mu gulu la vigeŵenga
June 6, 2022

Khoti likamba kutegherezga mulandu wake

Vyakukhwaskana na munthu uyu

Andrey Perminov

Chaka cha kubabikira: 1972 (Asha)

Mbiri yake: Apo wakaŵa muchoko wakaŵa makora waka, kweni vinthu vikasintha wati wamba kulwara ndipo wakamba kwendera kanjinga ka ŵakupendera. Wati wamalizga sukulu, wakamba kugwira ntchito yakukhwaskana na vya ndalama ku wupu unyake wakuwona vya ŵanthu ŵakupendera. Pasono wakugwira ntchito yakupanga mapulogiramu gha pa kompyuta kweniso ma webusayiti

Kufuma waka apo wakaŵa muchoko, wakajifumbanga chifukwa icho tiliri na umoyo. Wakamba kusambira Baibolo na Ŵakaboni ŵa Yehova mu 1995. Wakabatizika mu 1999. Wakatorana na Natalya mu 2015

Ivyo Wakayowoya

Kasi ni nkhani wuli za mu Baibolo izo zamukhozgani chomene?

Mwasonosono apa, wakufufuza mulandu wakaniyimbira foni na kuniphalira kuti ŵanipenge mulandu. Nati napulika ivi, nkhamba kwenjerwa chomene. Kweni zuŵa lenelira, ine na muwoli wane tikaŵa kuti taŵazga nkhani ya Davide apo Ŵaamaleki ŵakaŵa kuti ŵathereska msumba wa Zikilagi na kutolera waliyose ku wuzga. Pa nyengo yira, Davide ‘wakalira chomene, m’paka ŵakaŵavya nkhongono zakulilira.’ Kweni nangauli “wakakweŵeka chomene, . . . Davide wakajikhozga mwa Yehova Chiuta wake.” (1 Samuyeli 30:4, 6) Chiyelezgero cha Davide chikanovwira kukumbuka kuti na wovwiri wa Chiuta nane ningazizipizga chilichose. Vilije kanthu kuti kwali tingataya vichi, nanga tingaŵavya mtende wa mu mtima panji ŵanthu ŵangatinangira mbiri yithu, kweni Adada ŵithu ŵakuchanya ŵatovwirenge.

Nga ni Andrey, nase tingaŵa na chikanga pakumanya kuti Yehova wakaŵalekapo ŵekha yayi ŵateŵeti ŵake ŵa mu nyengo yakale. Tikukayika yayi kuti layizgo la Chiuta ili ndaunenesko, ilo likuti: “Nimunyamuraninge, kumovwirani na kumuthaskani nga umo nachitira.”—Yesaya 46:4.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI