Svetlana Monis

• Chaka chakubabikira: 1977 (ku Lesozavodsk)

• Mbiri yake: Wakusuzgika na nthenda ya maso. Wakutemwa kusambira viyowoyero vinyake. Wali kusambira Chitchayinizi, Chingelezi, na Chijeremani. Walera yekha mwana wake mwanalume kwa vyaka vinandi. Wali kujura resitiranti iyo mukuŵa vyakurya vya Chitchayinizi

  Wati wawona vinthu vyambura urunji ivyo vikuchitika mu charu, wakamba kusambira Baibolo. Wakabatizika mu 2005. Mu 2015, wakatengwa kwa Alam Aliyev, uyo nayo ŵakumuzenga mulandu

Pa September 26, 2019, D. Yankin, uyo ni mulara wa ŵakufufuza milandu wa Federal Security Service (FSB) ŵakamba kumupa mulandu Mudumbu Svetlana Monis. Khoti likamukanizga kugwiliskira ntchito galimoto yake kwa myezi pafupifupi yiŵiri, nangauli wakakhumbikwiranga galimoto yeneyiyi kuti wakawovwirenge abuya ŵake awo ŵali na vyaka 91.

Mu December 2019 ŵakaleka kufufuza mulandu wake. Pamanyuma, ŵalara ŵa boma ŵakapeleka mulandu uwu ku Khoti la Birobidzhanilo.

Para Mudumbu Svetlana wakukumbuka umo watambuzgikira, wakuti: “Apo ŵalara ŵa boma ŵakiza ku nyumba kwane kuzakasecha, nkhafipa mtima yayi. Ndipo pa nyengo iyi kakaŵa kakwamba kuti nipulikiske mazgu ghakuti: ‘Mbakukondwa awo ŵatambuzgika chifukwa cha urunji.’”—Mateyu 5:10.

Pamanyuma pakusecha, mfumu wa Mudumbu Svetlana, ŵakamukaka na kumuŵika mu selo kwa mazuŵa 8. Iyo wakuti: “Chikaŵa chakusuzga chomene kwa ine kuleka kufipira chomene mtima mfumu wane. Nkhafipanga chomene mtima chifukwa pasono mfumu wane suzgo lake la msana likulutira munthazi; ndipo ŵamazaza ŵakiza kuzakasecha nyumba yithu pati pajumpha waka sabata yimoza. . . kufumira apo tikalutira ku chipatala kukapokera wovwiri. Pakaŵavya nthowa yakuti nifumbire umoyo wa mfumu wane Alam, ntheura nkhamanya yayi usange wali makora panji yayi. Nkhamuphalira Yehova umo nkhajipulikiranga, nkhamulekera Yehova vyose ndipo nkhamanyanga kuti ndiyo wamupwelerenge makora chomene mfumu wane Alam.”

Mudumbu Svetlana wakukayika yayi kuti Yehova wakumovwira nyengo zose. Iyo wakuti: “Nkhajiwonera nekha umo wakanovwilira. Nkhawona kuti yikaŵa nyengo yakuti nifipirenge mtima yayi. . . . Nkhaleka kujighanaghanira chomene nekha. Kweni nkhaghanaghaniranga chomene umo ningachitira kuti nilutilire kuŵa wakugomezgeka kwa Yehova.”

Kuti ŵaleke kusunkhunyika, Mdumbu Svetlana na mfumu wake Alam, ŵakuyikapo mtima kukhozga chipulikano chawo. Mudumbu Svetlana wakati: “Zuŵa lililose, ine na mfumu wane tikuŵerengera lumoza lemba la zuŵa na kudumbiskana chaputara cha mu Baibolo. Tikuŵika chomene mtima pa Malemba agho ghakutichiska kugomezga chomene Yehova kweniso ghakupembuzga.” Lemba la chaka cha 2019 la Yesaya 41:10, ilo likuti: “Ungenjerwanga chara, pakuti ndine Chiuta wako,” likakumbuska kweniso kusimikizgira Mudumbu Svetlana na mfumu wake Alam chitemwa cha Yehova. Mudumbu uyu wakatiso: “Tikapulinta vesi ili na kulimata pa chimati.”

Chifukwa chakuti Mudumbu Svetlana wakuzizipizga viyezgo ivyo wakusangana navyo, vyawovwira kuti ŵabale ŵake awo Mbakaboni yayi ŵambe kuwona mwakwenelera ivyo wakugomezga. Mudumbu Svetlana wakati: “Pasono nkhukwaniska kupharazgira amama kwambura suzgo, kweni apo kumanyuma ŵakasuskanga chomene. Ŵakuchindika ivyo tikugomezga kweniso ŵakunichitira chitima chifukwa cha ivyo nkhusangana navyo na kunovwira.” Mudumbu Svetlana wakatiso: “Abuya ŵane ŵa vyaka 91 awo mbachisopa cha Orthodox nawo ŵakutifipira mtima. Nakuti ŵamba kunweka na fundo za mu Baibolo.”

Tikufipira mtima Mudumbu Svetlana na mfumu wake Alam. Tikugomezga kuti Yehova walutilirenge ‘kukhozga mitima yawo’ kuti ŵalutilire kuzizipizga.​—Salimo 10:17.