DECEMBER 16, 2021
RUSSIA

YASONO | Kuŵerenga Baibolo Zuŵa Lililose Kwawovwira Ŵabali 5 na Mudumbu Yumoza Kuti Ŵazizipizge Nthambuzgo

JULANI

Pa August 22, 2022, Khoti la Leninskiy ku Saransk likati Mubali Denis Antonov, Vladimir Atryakhin, Aleksandr Korolev, Georgiy Nikulin, na Mudumbu Yelena Nikulina, na Mubali Aleksandr Shevchuk, ŵali na mulandu. Denis, Aleksandr Korolev, na Aleksandr Shevchuk ŵakapika chilango chakuti ŵakagwire jele vyaka viŵiri. Georgiy na Yelena ŵakapika chilango chakuti ŵakagwire jele vyaka vinayi na myezi yiŵiri, ndipo Vladimir wakapika chilango chakuti wakagwire jele vyaka 6. Chigamuro ichi chili kwambapo kale kugwira ntchito.

Nyengo

Khoti la Leninskiy ku Saransk lipelekenge chigamuro chake sonosono apa pa mulandu wa Mubali Denis Antonov, Vladimir Atryakhin, Aleksandr Korolev, Georgiy Nikulin, Mudumbu Yelena Nikulina, na Mubali Aleksandr Shevchuk. Uyo wakwimira boma pa milandu wachali wandapemphe chilango icho ŵanthu aŵa ŵangapika
June 11, 2021

Khoti la Leninskiy ku Saransk likamba kutegherezga mulandu wawo
April 2, 2021

Yelena wakapika mulandu wakuchitako milimo na kunjizga ŵanthu mu gulu ilo likuchita vinthu vyakofya
March 31, 2021

Vladimir wakapika mulandu wakulongozga milimo ya gulu ilo likuchita vinthu vyakofya
July 2, 2019

Aleksandr Shevchuk na Georgiy ŵakafumiskika mu jele ilo ŵakasungikanga na kukanizgika kufuma mu chigaŵa icho ŵakakhalanga
March 28, 2019

Vladimir wakafumiskika mu jele umo wakasungikanga na kukanizgika kufuma mu chigaŵa icho wakakhalanga
February 8, 2019

Aleksandr Shevchuk, Vladimir, na Georgiy ŵakaŵasunga mu jele lakusungirako ŵanthu
February 4, 2019

Ŵa FSB ŵakajulira mulandu ŵabali 5 pamoza na Mudumbu Yelena kuti ŵakulongozga milimo ya gulu ilo likuchita vinthu vyakofya

Vyakukhwaskana na ŵanthu aŵa

Denis Antonov

Chaka cha kubabikira: 1976 (Syktyvkar, Komi Republic)

Mbiri yake: Apo wakaŵa mwana mbumba yakwawo yikatemwanga kusamasama chifukwa cha ntchito iyo adada ŵake ŵakagwiranga. Wakasambira vyakuwona vya magesi ku migodi kweniso vya umekaniki

Wakagwira ntchito yakuwona vya magesi ku mgodi unyake kwa vyaka 5. Wakutemwa kujambura vithuzi na maseŵera gha chess

Wakaŵa na mafumbo ghanandi ghakukhwaskana na Chiuta ndipo wakayezga kuŵazga mabuku gha chisopa ghanandi na Baibolo kweni wakaghasanga yayi mazgoro. Apo wakagwiranga ntchito ya usilikari, wakamba kulemberana makalata na mubwezi wake uyo wakaŵa kuti wakusambira Baibolo na Ŵakaboni ŵa Yehova. Denis wakakhwaskika chomene chifukwa cha kuwona umo Baibolo liliri launenesko kweniso kumanya zina la Chiuta lakuti Yehova. Wakabatizika na kuŵa Kaboni wa Yehova mu 1998. Wakatorana na Olga mu 2015

Ivyo Wakayowoya

Kasi mungatiphalirako vesi la mu Baibolo ilo lamovwirani kuti muŵe na chikanga kweniso kuzizipizga?

Lemba ilo nkhulitemwa chomene nda Genizesi 15:1 . . . Vesi ili ndakuzirwa chomene kwa ine chifukwa ndilo likizanga mu mutu mwane mise iyo ŵa FSB ŵakiza kunyumba kwane na kunitora kuti ŵakanifumbe mafumbo. . . . Likanovwira kuti mtima uŵe m’malo kweniso kuti nilutilire kuŵa wakugomezgeka.

Vladimir Atryakhin

Chaka cha kubabikira: 1987 (Rozhdestveno, Republic of Mordovia)

Mbiri yake: Wakalereka na mupapi yumoza. Wali na munung’una wake. Wakutemwa kuseŵera bola la malundi, volleyball, na hockey. Wakugwira ntchito yakupanga mapulogiramu gha pa kompyuta. Ndiyo ni mulara ku ntchito kwawo

Wakamba kunweka na uthenga wa mu Baibolo apo wakaŵa wachali ku sukulu. Wakabatizika na kuŵa Kaboni wa Yehova mu 2004. Wakatorana na Mariya mu 2009. Ŵali na ŵana ŵaŵiri ŵachoko, apo wakakakikanga munyake wakaŵa na myezi 9 ndipo munyake vyaka viŵiri

Ivyo Wakayowoya

Kasi ubwezi winu na Yehova wakhora wuli mu nyengo ya viyezgo iyi?

Nkhati natalikirana na mbumba yane, nkhaŵa na chitima chomene ndipo nkhatondekanga kukhala makora. Ŵakati ŵaluta nane ku jele lakusungirako ŵanthu, nkhasanga yumoza mwa awo ŵakugwira ku malo agha wakulemba vinthu vinyake. Apo nkhaŵa pa malo agha kulindilira, munthu uyu wakanifumba chifukwa icho ŵamazaza ŵanisungirenge mu jele. Nkhukumbuka kuti nkhamuphalira kuti nkhufipira mtima mbumba yane. Mwaluŵiro, munthu uyu wakati: “Ŵanthu ŵa mu mpingo wako ŵayilekengepo yayi mbumba yako.” . . . Iyo wakaŵa na chigomezgo chose kuti ŵabali na ŵadumbu ŵane ŵayiwovwirenge mbumba yane . . . Nkhawona kuti ni Yehova wakagwiliskira ntchito munthu uyu kunikumbuska kuti nkhwenera kuthemba Yehova. Nkhati nafuma ku jele uko ŵakanisunganga, na kukumana na muwoli wane, nkhakondwa chomene kuwona umo Yehova wakawovwilira mbumba yane kwizira mu ŵabali na ŵadumbu ŵithu.

Aleksandr Korolev

Chaka cha kubabikira: 1978 (Zemetchino, Penza Region)

Mbiri yake: Wakura kwambura adada ŵake. Apo wakaŵa mwana wakatemwanga kuŵeja somba na kuseŵera bola la malundi. Wati wamalizga sekondare, wakagwiranga ntchito yakwendeska mathiraki na mashini ghanyake. Wakagwiraposo ntchito ya kuliska na kuŵeta viŵeto pa famu yinyake. Pasono wakugwira ntchito ya ukalipentara

Wati wamba kusambira Baibolo na Ŵakaboni ŵa Yehova wakasanga mazgoro gha mafumbo agho ghakamusuzga kwa vyaka vinandi. Wakabatizika mu 1998. Mu 2006, wakatorana na Natalya, uyo wali na mwana mwanalume ndipo ŵakulelera lumoza

Ivyo Wakayowoya

Kasi mwasanga chandulo wuli chifukwa cha kusangikapo pa maungano sabata yiliyose?

Chigaŵa cha kuŵazga Baibolo pa maungano gha mukati mwa sabata chikunovwira chomene. Para nkhuŵazga vyakukhwaskana na ŵateŵeti ŵa Yehova ŵa mu nyengo yakale, nkhukhozgeka chomene chifukwa cha chikanga kweniso chipulikano icho ŵakalongora. Para nkhulondezga masachizgo agho tikusambira pa maungano vikunovwira kuti nichitenge vinthu mwalusungu. Nichali kulomba wovwiri wa umo ningachitira kuti nichitenge vinthu mwamahara na kuleka . . . kutukiska zina la Yehova.

Georgiy Nikulin

Chaka cha kubabikira: 1963 (Rovenky, Ukraine)

Mbiri yake: Wakasambira ntchito ya udilayivara na umekaniki. Wakumanyaso kuŵika vithuzi mu nyuzipepara, kunozga mawayilesi, na vinthu vinyake, kweniso vyakuŵajaŵaja

Wakutemwa kuŵerenga na kusambira vinthu viphya. Wakakhumbanga chomene kumanya uko ŵanthu ŵakafuma. Wati wamba kusambira Baibolo na Ŵakaboni ŵa Yehova wakasanga mazgoro ghakukhorweska gha mafumbo ghake

Ivyo Wakayowoya

Ntchivichi chikamovwirani kuti mulutilire kuŵa na chipulikano kweniso chikanga apo mukaŵa ku jele?

Kufufuza Malemba na kughanaghanirapo mavesi gha mu Baibolo kukanovwira chomene. Nakuti mu [Baibolo] muli viyelezgero vinandi chomene vya ŵateŵeti ŵa Yehova awo ŵakalongora chipulikano na chikanga. Nkhukondwa chomene kuyezga chipulikano chawo.

Tikumanya kuti kwamba kale Satana wakugwiliskira ntchito mautesi kuti watitondeske kuzizipizga. Tikumanyaso kuti tikwenera yayi kughaŵika kumtima mautesi ghose agho wakugwiliskira ntchito panji vinthu viheni ivyo wakutiyowoyera, chifukwa tikumanya kale kuti ndivyo vikwenera kuchitika.

Yelena Nikulina

Chaka cha kubabikira: 1968 (Monastyrskoe, Republic of Mordovia)

Mbiri yake: Apo wakaŵa mwana wakatemwanga kuseŵera mu chiwuvi na kusona. Wakasambira vya kusona ndipo pamanyuma wakasambira kudumura mapateni gha vyakusona. Wakasamira ku Saransk na Tolyatti chifukwa cha kupenja ntchito. Wakagwirapo ntchito ya kusona malaya. Pasono wakugwira ntchito ya kutozga malo

Wakatengwa kwa Georgiy mu 2016. Ŵakamba kusambira Baibolo. Ŵakasambira kuti Chiuta wakukhwaskika na masuzgo agho taŵanthu tikukumana nagho ndipo ngwalusungu na wachitemwa. Wakabatizika na kuŵa Kaboni wa Yehova mu 2017

Ivyo Wakayowoya

Kasi mukasanga chandulo wuli chifukwa cha wovwiri wakufuma ku ŵabali na ŵadumbu ŵinu?

Pati pajumpha chaka kufuma apo [ŵapolisi] ŵakazakasechera, nyumba yithu yikabuka moto ndipo tikaŵavya pakukhala. . . . Ŵabali na ŵadumbu ŵakatovwira chomene ndipo ivi vikaŵakhwaska chomene ŵachibali ŵane. Pasono ŵakulondezga fundo za mu Baibolo pa umoyo wawo ndipo [ŵakuluta panthazi mwauzimu].

Aleksandr Shevchuk

Chaka cha kubabikira: 1989 (Pyatigorsk, Chigaŵa cha Stavropol)

Mbiri yake: Wakasambira vya kukhwaskana na kuzenga. Pamanyuma wakasamira ku Saransk. Wakamba kugwira ntchito ku kampani yinyake ya vyakukhomakhoma. Wakutemwa basketball na table tennis

Agogo ŵa agogo ŵake ŵakatumizgika ku Siberia chifukwa cha kuŵa Ŵakaboni ŵa Yehova. Ŵapapi ŵake wose ŵakababikira ku Siberia

Wakabatizika mu 2006. Wakagwira ntchito yinyake padera pa kunjira usilikari uwo waliyose wakuchichizgika kunjira

Ivyo Wakayowoya

Pa myezi yinayi iyo ŵakamusungirani mu jele, ni vinthu wuli vyauzimu ivyo mukachitanga ivyo vyamovwirani kuzizipizga?

Kufuma waka apo nkhaŵa mwana, mulenji uliwose tikaŵazgiranga lumoza lemba la zuŵa nga ni mbumba pambere tindarye chakurya. Ivi vikapangiska kuti nizgoŵere chomene kuchita nthena pa umoyo wane, nanga ni apo nkhaŵa ku jele nkhaŵikapo mtima kulutilira kuchita nthena. Pakwamba apo nkhaŵavya Baibolo, nkhayezganga kukumbukira vesi panji chiyelezgero cha muteŵeti wa Yehova na kughanaghanirapo. Nkhani yakwamba iyo nkhakumbuka nja pa lemba la Yesaya 40:26-31. Lemba ili ndimoza mwa malemba agho nkhughatemwa chomene. Likunovwira kuti nileke kuluwa fundo yakuti Yehova ndiyo ni Mlengi ndipo wali na nkhongono chomene. Iyo wakugwiliskira ntchito nkhongono zake izi kuti watovwire mu nyengo zakusuzga, nangauli ndise waka ŵanthu.

Tikumanya kuti Yehova walutilirenge kulongora chitemwa chakugomezgeka kweniso kuchita vinthu mwakugomezgeka ku ŵabali na ŵadumbu ŵithu awo ŵakutambuzgika ku Russia apo ŵakulutilira kuthemba iyo.—Genizesi 32:10.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI