FEBRUARY 2, 2022
RUSSIA

YASONO | Kulutilira Kuchita Vinthu Vyauzimu Kukovwira Mubali Andrey Vlasov Kuti Wawonenge Vinthu Mwakwenelera

JULANI

Pa May 23, 2022, Khoti la Central ilo lili mu Msumba wa Prokopyevsk likati Mubali Andrey Vlasov wali na mulandu ndipo wakagwire jele vyaka 7. Chilango ichi chili kwambapo kugwira ntchito

Nyengo

July 2, 2020

Ŵamazaza ŵakamujulira mulandu Andrey chifukwa ŵakamughanaghaniranga kuti wakulongozga milimo ya gulu ilo likuchita vinthu vyakofya
July 12, 2020

Ŵa FSB ŵakasecha nyumba ya Andrey kweniso uko wakagwiranga ntchito. Ŵakamupoka mafoni ghake na Mabaibolo. Wakatumizgika ku jele uko ŵakusungako ŵanthu awo mulandu wawo underuzgike, ndipo awo ŵakafufuzanga mulandu wake ŵakamufumba mafumbo muwoli wake Nataliya
July 14, 2020

Wakafumiskika mu jele ilo wakasungikanga na kutumika pa jele la panyumba
June 9, 2021

Khoti likamba kutegherezga mulandu wake

Vyakukhwaskana na munthu uyu

Andrey Vlasov

Chaka cha kubabikira: 1968 (Prokopyevsk, Chigaŵa cha Kemerovo)

Mbiri yake: Wakutemwa kudinda vithuzi kweniso wakutemwa sumu. Wakagwirapo ntchito ya kujambura vithuzi

Munung’una wake ndiyo wakamusambizga Baibolo. Wakabatizika kuŵa Kaboni wa Yehova mu 1991. Wakatorana na muwoli wake Nataliya, mu 2003

Ivyo Wakayowoya

Ntchivichi chikumovwirani kuti muwonenge vinthu mwakwenelera?

Chifukwa chakuti zuŵa lililose nkhuŵa na vyakuchita vinandi, vikunovwira kuti nilutilire kuwona vinthu mwakwenelera. Nkhuŵazga Baibolo, kunozgekera maungano, kuwonelera mavidiyo ghithu gha gulu, kupenta, na kutegherezga ku mabuku ghakuchita kujamburika. Nkhugwiraso ntchito zinyake pano panyumba, kuseŵera chess, na kusona kweniso vinyake.

Kasi ŵabali na ŵadumbu ŵakumukhozgani wuli?

Nkhukhozgeka chomene para ŵabali na ŵadumbu ŵakuniphalira kuti ŵakunilombera, kweniso kuti chiyelezgero chane cha kuŵa na chipulikano chakukhora chikuŵakhozga, ndiposo kuti nawo ŵakukhumba kulutilira kugomezgeka kwa Yehova.

Kasi ni mavesi wuli gha mu Baibolo agho ngapadera kwa imwe, ndipo ghamovwirani wuli?

Lemba la 1 Petrosi 4:12-14 likawovwira ine na muwoli wane kuti tizizipizge apo ŵapolisi ŵakasechanga nyumba yithu, kutifufuza mulandu, na apo khoti likategherezganga mulandu withu. . . . Tikalemba mavesi agha na kughaŵika pakweru kuti tighawonenge. Apo nkhaŵa pa jele la panyumba, ine na muwoli wane tikaghanaghanirangapo mazgu agha ndipo ghakatikumbuskanga fundo yakuti Yehova watilekenge tekha yayi. Apo nkhaŵa mu jele lakusungirako ŵanthu, lemba la Yesaya 40:10-13 likanikhozga chomene. Pakuti pa nyengo iyi mtima wane ukaŵa m’malo, vikanovwira chomene kuti nileke kwenjerwa mwakujumphizga.

Ni mwaŵi wapadera chomene kuŵa ŵantchito ŵanyake na Andrey kweniso ŵabali na ŵadumbu ŵanyake ku Russia na Crimea apo ŵakulutilira kukhora mu chipulikano chawo mwachimwemwe.—2 Ŵakorinte 1:24.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI