AUGUST 23, 2023 | YASONO: JUNE 25, 2024
RUSSIA

YASONO—MUBALI ŴAMUSANGA NA MULANDU | “Chipulikano Chane Chikulutilira Kukhora Zuŵa Lililose”

JULANI

Pa June 24, 2024, Khoti ilo lili mu Msumba wa Lesosibirsk ku Chigaŵa cha Krasnoyarsk lili kumusanga na mulandu Mubali Valeriy Schitz. Ŵakuti wapeleke ndalama zakukwana 600,000 rubles ($6,894 U.S.).

Vyakukhwaskana na munthu uyu

Valeriy Schitz

Chaka chakubabikira: 1966 (Bolshaya Murta, Chigaŵa cha Krasnoyarsk)

Mbiri yake: Wakagwiranga ntchito ya vyakuzenga

Wakatorana na Irina mu 1987. Ŵali na ŵana ŵaŵiri ŵanalume

Wakamba kusambira Baibolo na Ŵakaboni ŵa Yehova pamoza na muwoli wake. Ŵakakondwa chomene na kufiskika kwa mauchimi gha mu Baibolo kweniso ŵakawona kusintha kukuru chifukwa cha kulondezga fundo za mu Baibolo. Wose ŵaŵiri ŵakabatizika mu 2008

Ivyo Wakayowoya

Kasi mwasambirapo vichi pa wovwiri uwo ŵabali na ŵadumbu ŵamupaninge?

Ŵabali na ŵadumbu ŵanandi ŵakati ŵapulika umo vinthu vyaŵira kwa ise, ŵakajipeleka chomene na kutovwira ndipo ŵakalongora kuti ŵakutitemwa chomene. Mbamtima wakupa ndipo mbakunozgeka kumalira nyengo yawo na nkhongono zawo na chilato chakuti ŵatovwire. Kwa ine chikaniŵiranga chakusuzga chomene pakwamba kupokera wovwiri kufuma ku ŵanji. Fundo yakuti uyo wakupeleka wakukondwa chomene kuluska uyo wakupokera nkhuyimanya makora chomene, ndipo ndivyo nakhala nkhuchita pa umoyo wane wose. Kweni nkhamanya kuti nkhwenera kusintha umo nkhuwonera vinthu na kuzomera kupokera wovwiri. Kuchita nthena kwanovwira kuwona umo ŵabali na ŵadumbu ŵakuyezgera chiyelezgero chiwemi cha Yehova na Yesu pa nkhani yakulongora chitemwa.

Ntchivichi chamovwirani kuti muleke kuthera?

Mkhristu waliyose wakusangana na vinthu ivyo vikuyezga chipulikano chake. Panyake mungajalirika mu jele yayi, kweni panji ungaŵa ulwari, kuchitirika vinthu vyambura urunji, panji nyifwa ya munthu uyo ukumutemwa. Lemba la Yakobe 1:3 likunikumbuska kuti ‘kuyezgeka kwa chipulikano chane kukubaba chizizipizgo.’ Ntheura nkhulomba kwa Yehova nyengo zose. Para nkhulomba, ndipo nkhuwona kuti ubwezi wane na iyo ukukhora chomene. Kweniso nkhongono zikukwera kumanya kuti ŵabali pa charu chose ŵakunilombera. Nthambuzgo iyi yinganimara nkhongono panji nakunitondeska kuchita vinthu vinyake, kweni yitondenge yayi. Chipulikano chane chikulutilira kukhora zuŵa lililose.

Tikupembuzgika kumanya kuti nanga tingasangana na viyezgo wuli, Yehova kweniso ŵabali na ŵadumbu ŵatovwirenge.—1 Petrosi 5:9, 10.

Nyengo

November 19, 2021

Khoti likamujulira mulandu
November 25, 2021

Ŵakasecha nyumba yake ndipo ŵakamutora kuti wakafumbike mafumbo
November 26, 2021

Wakakanizgika kuchita vinthu vinyake
May 18, 2022

Wakakanizgika kwenda maulendo ghanyake
April 10, 2023

Khoti likamba kutegherezga mulandu

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI