JUNE 8, 2022
RUSSIA

YASONO—MUBALI WAFUMISKIKA MU JELE | Ŵakukhozgeka na Ŵakhristu Ŵanyawo

JULANI

Pa November 10, 2022, Khoti ilo lili ku Vologda likapeleka cheruzgo chake pa mulandu wa apilu wa Mubali Yuriy Baranov na Nikolay Stepanov. Cheruzgo icho Yuriy wakapika pakwamba chindasinthe. Apo Nikolay chilango icho wakapika pakwamba chakuti wakagwire jele vyaka vinayi chikasintha. Pasono wali kupika chilango chakuti waleke kusangikaso na mulandu unyake kwa vyaka vinayi. Mwaluŵiro wakafumiskika mu jele.

Pa September 5, 2022, Khoti la Vologodskiy ilo lili ku Chigaŵa cha Vologda likati Mubali Yuriy Baranov na Nikolay Stepanov ŵali na mulandu. Yuriy wakapika chilango chakuti waleke kusangikaso na mulandu unyake kwa vyaka vinayi. Pasono ŵamujalirenge mu jele yayi. Nikolay wakapika chilango chakuti wakagwire jele vyaka vinayi. Chilango ichi chili kwambapo kugwira ntchito.

Nyengo

December 19, 2019

Ŵamazaza ŵakasecha nyumba 6 za Ŵakaboni ŵa Yehova ku Vologda. Yuriy na Nikolay ŵakakakika na kusungika dankha mu jele
December 20, 2019

Yuriy wakafumiskika mu jele na kutumika pa jele la panyumba
December 23, 2019

Nikolay wakatumika ku jele lakusungirako awo milandu yawo yinderuzgike
March 16, 2020

Yuriy wakafumiskika pa jele la panyumba kweni wakalutilira kukanizgika kuchita vinthu vinyake, ivyo vikapangiska kuti waleke kuyowoyeskana na ŵanyake awo ŵakapikanga milandu yakuyana waka kweniso kugwiliskira ntchito foni na intaneti
May 19, 2020

Yuriy wakazomerezgeka kuchita vinthu ivyo wakakanizgika
August 13, 2020

Nikolay wakafumiskika mu jele na kutumika pa jele la panyumba
September 25, 2020

Nikolay wakafumiskika pa jele la panyumba
March 7, 2022

Khoti likamba kutegherezga mulandu wawo

Vyakukhwaskana na ŵanthu aŵa

Yuriy Baranov

Chaka cha kubabikira: 1952 (Vologda, Chigaŵa cha Vologda)

Mbiri yake: Wakagwiranga ntchito ya kotchelera visulo. Pasono wali kupumura ndipo wakupwelelera amama ŵake ŵa vyaka 90 awo mbakupendera

Wakatorana na Nadezhda mu 1990

Wati wapenja mazgoro gha mafumbo ghakuzirwa ghakukhwaskana na umoyo kwa nyengo yitali, wakamba kusambira Baibolo na Ŵakaboni ŵa Yehova. Wakabatizika mu 1994

Ivyo Wakayowoya

Kasi ni mazgu wuli ghakukhozga agho ŵabali ŵakamuphalirani ndipo ghamovwirani kuzizipizga?

Ŵabali na ŵadumbu ŵakanitumiranga makadi na kuniyimbira foni kanandi waka. Nkhukumbuka kuti mubali munyake wakaniphalira kuti: “Vyose ivi vili na pakwambira; ndipo viliso na umaliro wake.” . . . Mulinda munyake wa ku jele uko nkhaŵa wakaniphalira kuti: “Kudandawura yayi vyose viŵenge makora.” Mazgu ghose agha nkhaghawonanga kuti ni Yehova wakunikhozga. . . . Vyakuchitika vyose ivi vikunikumbuska waka kuti Dada withu Yehova wakutighanaghanira chomene ndipo wakutipwelelera.

Nikolay Stepanov

Chaka cha kubabikira: 1974 (Vologda)

Mbiri yake: Wakaŵapo msilikari pambere wandaŵe Kaboni wa Yehova. Wakugwira ntchito ya kutozga mukati mwa nyumba kuti muŵe mwakutowa chomene

Wakagomezganga kuti Chiuta kulije. Muwoli wake, Alla uyo pa nyengo iyo ŵakaŵa waka pa chibwezi, wakamba kusambira Baibolo na amama ŵake mu 1995. Alla wakamovwira Nikolay kuti wakhorwe kuti Chiuta waliko nadi. Wose ŵakabatizika mu 1996 ndipo ŵakatorana mu 1997. Ŵali na mwana yumoza mwanalume

Ivyo Wakayowoya

Kasi ŵabali na ŵadumbu ŵamovwirani wuli mu nyengo yakusuzga iyi?

Ulendo unyake apo khoti likategherezganga mulandu wane, nkhakhozgeka chomene kuwona kuti ŵabali na ŵadumbu ŵazura mu khoti, ŵakaŵa pafupifupi 50!

Ŵabali na ŵadumbu ŵakunitumiraso makadi . . . , kweniso ŵakunilombera. Mudumbu munyake wakanilembera mazgu ghakukhozga chomene wakati: “Monire Mubali! Lutilirani kuŵa ŵachikanga na ŵakukhora. Yehova waŵenge namwe nyengo yose iyi. Ise taŵabwezi ŵinu, tilutilirenge kumulomberani kufumira pasi pa mtima, ndipo timuluwaninge yayi kweni tilutilirenge kumughanaghanirani. Adada ŵithu ŵakuchanya para ŵakumulaŵiskani ŵamwemweterenge chifukwa ŵakukondwa kuwona mukulutilira kugomezgeka, ndipo ŵakunotha namwe.”

Ntchakukhozga chomene kuwona ŵabali ŵithu ŵakulutilira kugomezgeka kwa Yehova nangauli ŵakutambuzgika.—1 Ŵatesalonika 3:7.