FEBRUARY 5, 2024 | YASINTHIKA: OCTOBER 9, 2024
RUSSIA

YASONO—MUBALI WAPIKA CHILANGO | “Nthowa Yako Uyipeleke kwa Yehova”

JULANI

Pa October 7, 2024, Khoti la Shadrinskiy ilo lili ku Chigaŵa cha Kurgan likadumura kuti Mubali Aleksandr Lubin wali na mulandu ndipo wali kupika chilango chakuti wapeleke ndalama za ku Russia zakukwana 500,000 rubles ($5,180 U.S.).

Vyakukhwaskana na munthu uyu

Aleksandr Lubin

Chaka cha kubabikira: 1956 (ku Ogonek, chigaŵa cha Kurgan)

Mbiri yake: Pambere wandapumure pa ntchito wakaŵa injiniya ku dipatimenti yakuwona vyangozi ku kamupani ya vyamagesi

Wakatorana na Tatyana mu August 2001. Ŵali na ŵana ŵaŵiri

Tatyana ndiyo wakamba kusambira Baibolo na Ŵakaboni ŵa Yehova. Tatyana wati wachita stroke, Aleksandr wakamba kumuŵerengera Baibolo ndipo nayo wakanweka. Aleksandr, Tatyana, kweniso ŵana ŵawo ŵaŵiri wose ŵakabatizika mu 2003

Aleksandr wakulwara nyamakazi (arthritis) ndipo wakugwiliskira ntchito visulo pakwenda. Kweniso mwasonosono ŵali kumusanga na nthenda yinyake iyo yikutimbanizga chivikiliro cha thupi lake

Ivyo Wakayowoya

Ntchivichi chikamovwirani kulutilira kuŵa wakukondwa pa nyengo iyo mukaŵa mu jele lakulindilirako awo milandu yawo yinderuzgike?

Kuŵa mu jele lakulindilirako mulandu ntchinthu chakusuzga chomene. Ŵakanizomerezganga yayi kuti nipokere munkhwala wakuti unovwire ku ulwilwi uwo nkhaŵa nawo chifukwa cha nyamakazi. Pakwamba nkhalomba kwa Yehova kumupempha kuti wanovwire kuti nifumiskike mwaluŵiro. Ndipouli, nyengo yati yajumphapo, nkhamba kulomba kuti wanovwire kuti niŵe na mtima wakuzika kweniso mtende. Nkhalomberangaso chomene ŵabali na ŵadumbu awo nawo ŵakaŵa mu jele. Nkhajikumbuskanga kuti, ‘Suzgo ili ndakanyengo kachoko waka.’ So nkhamba kughanaghanirapo pa vitumbiko ivyo Yehova wakanipanga m’malo mwa masuzgo agho nkhakumananga nawo. Kuchita nthena kukanovwira kuti nilutilire kuŵa wakukondwa. Paumaliro nkhafumiskika mu jele lakulindilirako. Lemba la Salimo 37:5 likanikhozga chomene, ilo likuti: “Nthowa yako uyipeleke kwa Yehova; umugomezge, ndipo wakovwirenge.” Nakhorwa kuti Yehova wazomerezgenge yayi kuti tikumane na viyezgo ivyo tingatondeka kuzizipizga. Watondekengepo yayi kupeleka nthowa yakutovwira kuzizipizga chikuru tikumugomezga na kumuthemba.

Tikukhozgeka kumanya kuti nga ni Aleksandr, nanga tingaŵa mu visuzgo vikuru, kweni tingalutilira kuŵa ŵakugomezgeka apo tikuthemba wovwiri wa Yehova.—Yesaya 38:14.

Nyengo

July 13, 2021

Ŵakamujulira mulandu
July 14, 2021

Ŵakasecha nyumba 8 za Ŵakaboni ŵa Yehova. Mubali Aleksandr wakakakika, kufumbika mafumbo kweniso ŵakamujalira mu jele lakulindilirako mulandu
July 16, 2021

Ŵakamusamuskira ku jele lakulindilirako awo milandu yawo yinderuzgike
July 19, 2021

Wakachita apilu mulandu chifukwa cha ulwari
August 28, 2021

Aleksandr wakafumiskika, kweniso kukanizgika kuluta ku vigaŵa vinyake pamanyuma pakuti Khoti Lakuwona vya Wanangwa wa Ŵanthu ku Europe kweniso ŵanthu awo ŵakulwera wanangwa wa ŵanthu ŵapempha kuti wafumiskike
July 14, 2023

Khoti likamba kutegherezga mulandu wake
September 7, 2023

Ŵakayimiska dankha mulandu wake chifukwa cha ulwari

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI