Pa April 19, 2022, Khoti la Neftekumskiy ilo lili ku Chigaŵa cha Stavropol, likati Mubali Aleksandr, Konstantin, na Shamil ŵali na mulandu. Aleksandr na Shamil ŵakeruzgika kuti ŵaliyose wapeleke ndalama zakukwana madora gha ku America 6,055. Ŵapelekenge yayi ndalama izi chifukwa cha utali wa nyengo iyo ŵakaŵasungira mu jele. Konstantin wakapika chilango chakuti wakagwire jele vyaka 7 na myezi 6. Nyengo yeneyiyo ŵakaluta nayo ku jele.

Aleksandr Akopov

• Chaka cha kubabikira: 1992 (ku Neftekumsk)

• Mbiri yake: Wakugwira ntchito ya vyakuzenga pamoza na adada ŵake na mukuru wake. Wakutemwa kuseŵera bola la malundi, basketball, na tennis, kuwona chilengiwa, na kuphika

  Wakabatizika na kuŵa Kaboni wa Yehova mu 2007 apo wakaŵa na vyaka 14

Konstantin Samsonov

• Chaka cha kubabikira: 1977 (ku Neftekumsk)

• Mbiri yake: Apo wakaŵa muchoko wakatemwanga maseŵera gha chess na vya makompyuta. Pasono wakugwira ntchito ya uinjiniya pa chipatala chinyake. Iyo na muwoli wake Svetlana, ŵakamba kusambira Baibolo na Ŵakaboni ŵa Yehova mu 1998. Ŵakabatizika mu 2000. Ŵali na mwana yumoza mwanalume

Shamil Sultanov

• Chaka cha kubabikira: 1977 (ku Mahmud-Mekteb, Chigaŵa cha Stavropol)

• Mbiri yake: Wakunozga nyumba izo zanangika. Wakamba kusambira Baibolo na Ŵakaboni ŵa Yehova cha kukwambilira kwa 2000. Wakabatizika mu 2003. Wakatorana na muwoli wake Elena mu 2004. Wakamovwirako kulera mwana wamusangapo uyo wakiza nayo kufuma ku nthengwa yakwamba

Pa Chisulo, August 26, 2017, ŵapolisi awo ŵakayegha futi ŵakazingilizga Ŵakaboni ŵa Yehova 18 awo ŵakasangwanga ku nyanja ya kufupi na Neftekumsk. Pa Ŵakaboni aŵa pakaŵa ŵana na ŵachekuru wuwo, ndipo wose ŵakaŵatora pa basi na kuluta nawo ku ofesi ya ŵapolisi uko ŵakakaŵafumba mafumbo kwa maora ghatatu. Kufuma apo, ŵabali na ŵadumbu ŵanandi ku Neftekumsk ŵakamba kuŵafufuza ndipo nyumba zawo zikasecheka. Aleksandr, Konstantin, na Shamil ŵakakakika ndipo ŵakasungika mu jele pafupifupi chaka chimoza.

Aleksandr wakuti wakachitanga wofi kujalirika mu jele chifukwa wakusuzgikanga kale maghanoghano kweniso wali na masuzgo ghanyake mu thupi. Iyo wakalomba kwa Yehova kuti mtima uŵe m’malo kweniso kuti wamupe nkhongono zakuzizipizgira mu jele. Aleksandr wakuti: “Kanandi pakaŵanga vinthu ivyo vikanipangiskanga kuti nimuphalire Yehova kuti ningafiska yayi kuzizipizga. Kweni nkhazizwa kuwona kuti nakwaniska kuzizipizga pafupifupi chaka chimoza mu jele.” Yehova wakazgora malurombo ghake mwa kumovwira kukumbuka mavesi gha mu Baibolo pa nyengo iyo wakaŵavya Baibolo. Iyo wakalembanga vesi lililose ilo wakukumbuka, ndipo mulenji uliwose wakawelerangamo vesi limoza na kughanaghanira umo lingamovwilira pa nyengo iyo. Ivi vikamovwira kuti wambe kughanaghana na kuwona vinthu nga ni Yehova.

Konstantin wakakhozgeka chomene chifukwa cha makalata agho muwoli wake wakamulemberanga. Iyo wakukumbuka kuti mu kalata yinyake, muwoli wake wakamuphalira kuti wambe kuwona masuzgo agho wakusangana nagho nga ni vyakuchitika vyapadera. Konstantin wakuti: “Ivi vikanikhozga chomene ndipo nkhamba kuwona vinthu mu nthowa yinyake.”

Shamil wakuti myezi yakwamba iyo wakaŵira mu jele vinthu vikaŵa makora yayi. Iyo wakuti: “Mu kuluta kwa nyengo vinthu vikamba kuŵako makora. Ivi vikanovwira waka kumanya kuti nili nekha yayi.” Pa nyengo yakusuzga iyi, wakasambira kuthemba Yehova mwa kuleka kwenjerwa na viyezgo ivyo vikwiza munthazi.

Pasono ŵabali wose ŵatatu aŵa ŵakukanizgika kufuma mu vigaŵa ivyo ŵakukhala, kugwiliskira ntchito foni panji Intaneti. Ivi vikupangiska kuti chiŵe chakusuzga kwa Aleksandr kupokera wovwiri wakukhumbikwa wa chipatala, kweniso Konstantin wakutondeka kuluta kukagwira ntchito yake ya kupanga mapulogiramu gha pa kompyuta. Nangauli ŵakusangana na masuzgo ghose agha, kweni ŵabali aŵa ŵaŵikapo mtima kulutilira kugomezgeka kwa Chiuta wawo.

Tikumanya kuti Yehova waŵatumbikenge ŵabali aŵa apo ŵakulutilira kuthemba iyo.—Salimo 20:7.