Pa February 3, 2022, Khoti la Ussuriyskiy ilo lili ku Chigaŵa cha Primorye likati Sergey wali na mulandu. Wakapika chilango chakuti waleke kusangikaso na mulandu kwa vyaka vitatu.

Sergey Melnikov

• Chaka cha kubabikira: 1973 (Terney, ku Chigaŵa cha Primorye)

• Mbiri yake: Wachitapo ntchito ya ukalipentara, ulovi, ukilinara, na ya kuzimwiska moto. Apo wakaŵa muchoko wakatemwanga kuseŵera hockey na volleyball. Wakamba kusambira Baibolo na Ŵakaboni ŵa Yehova cha kukwambilira kwa vyaka vya m’ma 2000. Wakasamukira ku Ussuriysk mu 2003 ndipo wakabatizika mu chaka chenechichi

Mubali Sergey Melnikov ŵakamba kumuyimba mulandu mu June 2019. Ŵamazaza ŵakamupa mulandu apo wakadumbiskananga fundo za mu Baibolo na munthu munyake wakunweka. Ŵamazaza ŵakasecha mu nyumba yake na kumupoka laputopu na foni yake.

Sergey ŵakamusunga mu selo kwa myezi yinayi kweniso pa jele la panyumba kwa mazuŵa 145. Nyengo zinyake Sergey nkhongono zikumaliranga. Pa nyengo izi wakakumbukanga mazgu gha pa 1 Ŵakorinte 10:13 ndipo wakajipulikangako makora. Iyo wakuti: “Nkhumanya kuti Yehova wakazomerezga kuti viyezgo ivi vinichitikire, mbwenu ndikuti ningavizizipizga. Yehova wakanipa ‘nkhongono zakuluska zakawiro.’”—2 Ŵakorinte 4:7.

Pa February 25, 2020, Sergey ŵakamufumiska pa jele la pa nyumba. Ndipouli, ŵamazaza ŵakamukanizga kwenda.

Apo tikulindilira cheruzgo, tili na chigomezgo chose kuti Yehova walutilirenge kuŵa ‘movwiri na chiskango’ kwa Mubali Sergey na ŵabali na ŵadumbu ŵithu wose ku Russia.—Salimo 115:11.