Pa December 16, 2021, Khoti la Jewish Autonomous Region likakana apilu ya Mudumbu Tatyana Sholner.

Pa June 25, 2021, Khoti la Birobidzhan ilo lili ku Chigaŵa cha Jewish Autonomous, likati Mudumbu Tatyana Sholner wali na mulandu ndipo waleke kusangikaso na mulandu kwa myezi 30. Ulendo uwu ŵamujalirenge mu jele yayi.

Tatyana Sholner

• Chaka cha kubabikira: 1993 (Birobidzhan)

• Mbiri yake: Adada ŵake ŵakafwa apo wakaŵa wachali muchoko, iyo na mudumbu wake ŵakalereka na amama ŵawo pera. Wakugwira ntchito mu pharmacy. Wakutemwa kuseŵera mu chiwuvi, kutchova njinga, na kuseŵera volleyball

  Wakamba kunweka na uthenga wa mu Baibolo apo wakaŵa pa koleji yinyake yakusambizga vya kusona. Wakakhorwa na nkharo ya munyake uyo wakasambiranga nayo sukulu, uyo wakaŵa Kaboni wa Yehova. Wakapembuzgika chomene na chigomezgo cha chiwuka apo muvyara wake wa vyaka 12 wakatayika mu 2014. Wakabatizika mu 2017

Pa February 6, 2020, ŵamazaza ŵa ku Birobidzhan ŵakamba kuŵapa mulandu ŵadumbu 6, kusazgapo mudumbu Tatyana uyo wali na vyaka 27. Iyo pamoza na ŵanyake ŵakupika mulandu wakuchita “vinthu vyakofya” chifukwa waka chakuchita vinthu vyakukhwaskana na chisopa chake. Ku chigaŵa cha Jewish Autonomous, Ŵakaboni ŵa Yehova ŵali kupika milandu 19.

Tatyana wakukhorwa kuti Yehova wakumovwira mu nyengo yakusuzga iyi. Iyo wakuti: “Apo ŵakambanga kunitambuzga, nkhagongowa pachoko waka, kweni nkhalekapo yayi kuŵazga Baibolo. Nkhamuphalira vyose Yehova, umo nkhujipulikira kweniso ivyo nkhufipa navyo mtima. Nkhamulomba mzimu wake utuŵa kuti nizizipizge vinthu vyose na kulutilira kuŵa wakugomezgeka kwa iyo m’paka pa umaliro. Nkhalomba kuti niŵe wachikanga na wavinjeru kuti mu khoti nkhavikilire zina la Chiuta na mtima wose.”

Iyo wakulutizga kuti: “Kumanya kuti nyengo zose Yehova wakovwira na kuvikilira ŵateŵeti ŵake, ndivyo vikunovwira kulutilira kuŵa wakukondwa. Yehova wanikora na woko lake lamalyero lankhongono. Ivi vikunovwira kuti nimugomezgenge chomene kweniso kuti mtima wane ulutilire kuŵa m’malo apo nkhutambuzgika.”—Yesaya 41:10.

Apo tikulindilira ivyo khoti leruzgenge, tili na chigomezgo chose kuti na wovwiri wa Yehova, Tatyana walutilirenge ‘kuzizipizga mu suzgo.’—Ŵaroma 12:12.