MARCH 24, 2022
RUSSIA

YASONO | Yehova Wakovwira Mbumba za Ŵabali 6 Awo Ŵakusungika mu Jele

JULANI

Pa September 19, 2022, Khoti la mu Msumba wa Gukovo, ku Chigaŵa cha Rostov likati Mubali Aleksey Dyadkin, Aleksey Goreliy, Nikita Moiseyev, Vladimir Popov, Yevgeniy Razumov, na Oleg Shidlovskiy ŵali na mulandu. Mubali Goreliy na Shidlovskiy ŵakapika chilango chakuti ŵakagwire jele vyaka 6 na hafu. Mubali Dyadkin, Moiseyev, Popov, na Razumov ŵakeruzgika kuti ŵakagwire jele vyaka 7. Chilango ichi chili kwambapo kugwira ntchito

Nyengo

August 8, 2020

Ŵa FSB ŵakasecha nyumba 17 za Ŵakaboni ŵa Yehova mu misumba yitatu ku Chigaŵa cha Rostov kweniso mu msumba wa Kursk. Mubali Goreliy, Moiseyev, Razumov, na Shidlovskiy ŵakakakika ndipo zuŵa lakulondezgapo ŵakaŵasunga dankha mu jele kulindilira kuti mulandu wawo weruzgike. Mubali Popov wakaŵikika mu gulu la ŵanthu awo boma likuŵapenja chomene
August 12, 2020

Ŵa FSB ŵakamukaka Mubali Popov. Pamanyuma pa mazuŵa ghaŵiri, ŵakamusunga dankha ku jele kulindilira kuti mulandu wake weruzgike
August 21, 2020

Mubali Dyadkin wakaluta kuti ŵakamufumbe mafumbo, kweni paumaliro ŵakamusunga dankha mu jele
June 28, 2021

Loya wakaluta kukawonana na ŵabali 6 aŵa ku jele uko ŵakasungikanga. Ŵakamuphalira umo vinthu vikaŵira mu jele, mwachiyelezgero mu maselo mukawotchanga chomene m’paka madigiri 40, mu viliŵa mukaŵa chuku, kweniso ŵanyawo awo ŵakaŵira lumoza mu maselo ŵakaŵa na COVID-19
July 21, 2021

Mubali Popov wakamba kusuzgika kuthuta ndipo ŵakaluta nayo ku jele linyake ilo kukaŵa dipatimenti ya vyachipatala. Pamanyuma ndipo ŵakaluta nayo ku chipatala cheneko
September 30, 2021

Mubali Popov ŵakaweleraso nayo ku jele ilo wakasungikanga pamanyuma pakuti wakhala mu chipatala kwa myezi yakujumpha yiŵiri
November 17, 2021

Khoti likamba kutegherezga mulandu, ndipo ŵabali wose 6 ŵakaŵasazgirako nyengo ya kuŵasungira mu jele

Vyakukhwaskana na ŵanthu aŵa

Aleksey Goreliy

Chaka cha kubabikira: 1980 (Ryazan, Chigaŵa cha Ryazan)

Mbiri yake: Apo wakaŵa muchoko wakatemwanga kusambira vyakukhwaskana na kupanga mapulani gha vyakuzenga na mbiri yakale, kweniso kupanga tumaboti twakuseŵereska. Wakagwirapo ntchito ya ukauntati pa kampani yinyake yakupanga sopo

Wakasambira unenesko kufuma kwa amama na abuya ŵake. Wakabatizika mu 1995. Wakatorana na Inna mu 2011. Ŵali na mwana yumoza mwanalume

Ivyo Wakayowoya Muwoli wa Aleksey, Inna b

Kasi lilipo vesi la mu Baibolo ilo likumupani nkhongono?

Kanandi nkhukumbuka mazgu gha mpositole Paulosi ghakuti: “Pakuti para nili wakulopwa, apo ndipo nkhuŵa wankhongono.” (2 Ŵakorinte 12:10) . . . Apo ŵamazaza ŵakiza na kusecha nyumba yithu pamanyuma na kumukaka Aleksey, mahara ghakanimalira, nkhajipulika nga kuti apo nkhimilira charu chalindimuka waka. Lemba ili likanisimikizgira kuti Yehova wanipenge nkhongono zakuzizipizgira chilichose mu nthowa yiwemi mwakuti iyo wapike uchindami.

Nikita Moiseyev

Chaka cha kubabikira: 1990 (Dinskaya, Chigaŵa cha Krasnodar)

Mbiri yake: Wakagwiranga ntchito ya vya magesi kweniso yakunozga vinthu vya magesi. Wakabatizika mu 2004

Wakakumana na Sofiya mu 2011 apo wakagwiranga ntchito pa chipatala chinyake cha ŵana m’malo mwa kunjira usilikari. Ŵakatorana mu 2013

Ivyo Wakayowoya Muwoli wa Nikita, Sofiya c

Kasi ubwezi winu na Yehova wamovwirani wuli kuti muleke kusuzgika chomene maghanoghano chifukwa cha kukakika kwa mfumu winu?

Nkhati nawona waka ŵamazaza ŵimilira pa mulyango withu, nyengo yeneyiyo nkhajipulika kuti nili na “mtende wa Chiuta uwo ukuluska maghanoghano ghose,” nga umo likuyowoyera lemba la Ŵafilipi 4:7. Kakaŵa kakwamba kuti mtima uŵe m’malo nthena. Nkhawamo kuti tili pa nthowa yakwenelera . . . ndipo Yehova wali nase. Ivi vikanikhozga chomene. Nkhamanyanga yayi icho chichitikirenge mbumba yithu . . . Nkhawonanga kuti chilichose chisinthenge pa umoyo wane. Nangauli vikaŵa nthena, kweni mutu ukayimirathu yayi panji kuti nkhajipulika kuti nili nekha.

Vladimir Popov

Chaka cha kubabikira: 1967 (Shakhty, Chigaŵa cha Rostov)

Mbiri yake: Wali na malo ghakunozgerako magalimoto. Wakutemwa kuŵeta njuchi

Wakatorana na Irina mu 1985. Ŵakabatizika mu chaka chenechichi. Ŵali na ŵana ŵanalume ŵaŵiri na mwanakazi yumoza

Ivyo Wakayowoya Muwoli wa Vladimir, Irina d

Kasi ŵabali na ŵadumbu ŵakumovwirani wuli imwe na mfumu winu?

Nkhuwonga chomene wovwiri uwo ŵabali na ŵadumbu ŵakutipa. Wose ŵakutifipira mtima, ŵakutilombera, ndipo ŵakuchita chilichose kuti ŵatovwire. Nasanga ŵabwezi ŵaphya ŵanandi mu vigaŵa vyakupambanapambana vya kuno ku Russia kweniso pa charu chose. Nkhumuwonga chomene Yehova chifukwa cha ubali wa pa charu chose uwu. Watizingilizga waka na chitemwa chake kulikose uko tinganjilira. Kwambura wovwiri wake, mphanyi tekha tafiska yayi kuzizipizga chiyezgo chikuru ichi.

Yevgeniy Razumov

Chaka cha kubabikira: 1979 (Gukovo, Chigaŵa cha Rostov)

Mbiri yake: Wakugwira ntchito ya upulambara

Wakaleka kukhweŵa na kugwiliskira ntchito munkhwala wakutimbanizga wongo wati wamba kusambira Baibolo na Ŵakaboni ŵa Yehova. Wakabatizika mu 2002

Wakatorana na Natalya mu 2005

Ivyo Wakayowoya Muwoli wa Yevgeniy, Natalya e

Kasi Yehova wakumovwirani wuli mu nyengo yakusuzga iyi?

Mfumu wane ndiyo wakagwiranga ntchito mu mbumba yithu. Ndine wakupendera kufuma waka pa wana ndipo nkhutondeka kugwira ntchito. Pasono nilije nthowa yakusangira ndalama. [Ndipouli], namba kuwona umo Yehova wakunovwilira. Nyengo zinyake nkhuŵa kuti ndivyo nakhazganga yayi, ndipo ivi vikunikondweska chomene na kunovwira kuŵa wankhongono kweniso kugomezga kuti nili nekha yayi. . . . Ivi vikunipangiska kukhorwa kuti Yehova wakumanya ivyo vikuchitika ndipo wachitengepo kanthu kunovwira.

Oleg Shidlovskiy

Chaka cha kubabikira: 1969 (Gornyatskiy, Chigaŵa cha Rostov)

Mbiri yake: Apo wakaŵa muchoko wakatemwanga maseŵera ghakupambanapambana, chomene basketball. Wakagwirapo ntchito ya usambizgi

Wakamba kusambira Baibolo na Ŵakaboni ŵa Yehova apo wakaŵa ku yunivesite. Wakabatizika mu 1991

Wakatorana na Natalya mu 1998. Ŵali na ŵana ŵanakazi ŵaŵiri

Ivyo Wakayowoya Muwoli wa Oleg, Natalya f

Ntchivichi chikumovwirani kuti muwonenge vinthu mwakwenelera apo mfumu winu wali mu jele?

Nkhumalira nyengo yinandi kusambira panekha mwakuti nizizipizge chitima icho nili nacho. Pasono ntchakusuzga kuchezga na ŵanyane chifukwa cha muliri uwu, ntheura nkhuyezga kujitangwaniska na ntchito za pa nyumba kuti nileke kusuzgika maghanoghano.

Niliso na Adada ŵane ŵakuchanya awo ŵakunipwelelera na kunitemwa chomene kweniso ŵabali na ŵadumbu. Panekha mphanyi nafiska yayi kuzizipizga chiyezgo ichi. Ŵabali ŵakiza mwaluŵiro na kunifumba ivyo ŵangachita kuti ŵanovwire.

Tikulutilira kuŵalombera kwa Yehova ŵabali na ŵadumbu ŵithu aŵa pamoza na mbumba zawo. Tili na chigomezgo chose kuti Yehova walutilirenge kuŵapa chipulikano kweniso nkhongono izo ŵakukhumbikwira.—Ŵaroma 15:30.

a b c d e f Pakuti ŵabali wose 6 ŵachali kusungika mu jele, tikatondeka kuchezga na iwo ŵeneko.