Khoti la Surgut ilo lili ku Chigaŵa cha Khanty-Mansi Autonomous lipelekenge chigamuro chake sonosono apa pa mulandu wa ŵabali ŵakukwana 17 na mudumbu yumoza. Ŵanyake mwa iwo ni Mubali Yevgeniy Fedin, Artur Severinchik, na Timofey Zhukov. Wakwimira boma pa milandu wachali wandapemphe chilango icho ŵangapika.

1. February 15, 2019

   Ŵapolisi ŵakasecha nyumba zinandi za Ŵakaboni ŵa Yehova ku Surgut na misumba yapafupi. Ŵabali 7 ŵakuti ŵakaŵachitira nkhaza apo ŵakaŵafumbanga mafumbo. Ŵabali ŵatatu ŵakaŵasunga dankha mu jele, ŵamoza ŵawo ŵakaŵa Yevgeniy Fedin na Artur Severinchik

2. March 7, 2019

   Khoti la apilu likati Artur ŵamufumiske mu jele umo ŵakamusunganga para pajumpha mazuŵa 21

3. April 11, 2019

   Yevgeniy wakafumiskika mu jele wati wakhalamo pafupifupi myezi yiŵiri. Khoti likamukanizga kwenda kufuma mu chigaŵa icho wakakhalanga, kuyowoyeskana na ŵanthu mu nthowa zakupambanapambana, na kugwiliskira ntchito intaneti

4. January 16, 2020

   Mweruzgi wakati Mubali Timofey Zhukov walute ku chipatala cha ŵanthu ŵakuzweta mutu kuti ŵakamuwone. Ŵakufufuza mulandu ndiwo ŵakapangiska ivi chifukwa ŵakawona kuti wakakhalanga waka chete para ŵakumufumba mafumbo, kweni uwu ni wanangwa wa munthu waliyose kuyana na Dango 51 mu Malango gha boma la Russia. Timofey wakachita apilu ivyo ŵakamutuma kuchita

5. February 5, 2020

   Ŵapolisi ŵakamukaka Timofey apo wakafumanga mu khoti. Nangauli apilu iyo wakachita pa ivyo khoti likadumura yikaŵa yindazgoreke, ŵapolisi aŵa ŵakamukwezga galimoto na kuluta nayo ku chipatala cha ŵanthu ŵakuzweta mutu icho chili ku Yekaterinburg, mtunda wa makilomita pafupifupi 1,200 ndipo uku wakakhalako mazuŵa 14

6. March 5, 2020

   Khoti la apilu likati ŵamazaza ŵakabuda pakumutolera Timofey ku chipatala mwakuchita kumuchichizga

7. October 19, 2021

   Khoti la apilu likati ŵamulipire Timofey chifukwa ŵakaluta nayo ku chipatala pa vifukwa vyambura kupulikikwa

8. November 12, 2021

   Apo khoti likategherezga kakwamba mulandu uwu, maloya agho ghakimiranga ŵabali ghakapeleka ukaboni wa vinthu viheni ivyo ŵamazaza ŵakachita, nga kuŵachitira nkhaza ŵabali, ukaboni wautesi, na kulemba ŵanthu kuti ŵakachitire ukaboni wautesi. Maloya agha ghakapempha khoti kuti mulandu uwu uwelere kwa wakwimira boma pa milandu

9. November 15, 2021

   Mweruzgi wakazomerezga kuti vigaŵa vinyake vya ukaboni wa mulandu uwu vikuswa dango, kweni wakakana kuwezgera mulandu kwa wakwimira boma pa milandu

Tili na chigomezgo chose kuti Yehova walutilirenge kuŵa na Mubali Yevgeniy, Artur, Timofey, kweniso ŵabali na ŵadumbu wose awo ‘ŵakulaŵiska pa vinthu vyambura kuwoneka’ apo ŵakuzizipizga nthambuzgo.—2 Ŵakorinte 4:17, 18.