MARCH 23, 2022
RUSSIA

Yehova Wakuŵawovwira Ŵabali na Ŵadumbu 6 Ŵakugomezgeka

JULANI

Khoti la Industrialniy ilo lili ku Chigaŵa cha Khabarovsk lipelekenge chigamuro chake sonosono apa pa mulandu wa Mudumbu Maya Karpushkina, Mubali Stanislav Kim, Mubali Nikolay Polevodov, Mudumbu Svetlana Sedova, Mubali Vitaliy Zhuk na muwoli wake Tatyana. Wakwimira boma pa milandu wachali wandapemphe chilango icho ŵangapika.

Nyengo

November 10, 2018

Ŵamazaza ŵakalekeska ntchezgo iyo pakaŵa ŵanthu pafupifupi 55 ku malo ghanyake ghakulyera. Wose awo ŵakaŵapo kusazgapo ŵana ŵachoko, ŵakaŵafumba mafumbo, kuŵadindiska minwe yawo pa mapepara, na kuŵajambura vithuzi
November 12, 2018

Stanislav, Nikolay, na Vitaliy ŵakaŵasunga dankha mu jele. Maya, Svetlana, na Tatyana ŵakakanizgika kwenda maulendo ghanyake
January 14, 2019

Nikolay na Vitaliy ŵakafumiskika mu jele ilo ŵakasungikanga na kutumika pa jele la panyumba
January 29, 2019

Stanislav wakafumiskika mu jele ilo wakasungikanga na kutumika pa jele la panyumba
July 18, 2019

Mulandu ukatumizgika ku Khoti la Industrialniy ilo lili ku Chigaŵa cha Khabarovsk
August 2, 2019

Nikolay wakafumiskika pa jele la panyumba
September 9, 2019

Mulandu wa Stanislav na Nikolay ŵakawutuma ku Khoti la Zheleznodorozhniy ku Khabarovsk
November 5, 2019

Nikolay wakakanizgika kwenda maulendo ghanyake
January 18, 2020

Stanislav na Vitaliy ŵakafumiskika pa jele la panyumba
February 4, 2020

Stanislav na Nikolay ŵakapika milandu yakupambana. Khoti la Zheleznodorozhniy ku Khabarovsk likeruzga kuti waliyose waleke kusangikaso na mulandu kwa vyaka viŵiri kweniso kufuma apo ŵazamuŵawonerapo usange ŵali na nkharo yiwemi
August 3, 2020

Mulandu uwo ukaŵa ku Khoti la Industrialniy ukawezgekera ku ofesi ya wakwimira boma pa milandu, ndipo ivi vikapangiska kuti wakwimira boma pa milandu wachite apilu mulandu uwu
September 29, 2020

Khoti la Khabarovsk likamba kuwona apilu iyo wakachita wakwimira boma pa milandu. Stanislav na Nikolay ŵakazomerezgeka kuyowoyeskana na mweruzgi. Iwo ŵakalongosora makora fundo yakuti boma la Russia nalo lili kusayinira malango ghakuti lileke kuswa wanangwa wa ŵenekaya ŵake kweniso wanangwa wa kusopa
October 12, 2020

Khoti la Khabarovsk likakolerana na ivyo likadumura Khoti la Industrialniy ndipo mulandu ukawelera ku ofesi ya wakwimira boma pa milandu
December 15, 2021

Mulandu ukalutaso ku Khoti la Industrialniy

Vyakukhwaskana na ŵanthu aŵa

Stanislav Kim

Chaka cha kubabikira: 1968 (Khabarovsk, Chigaŵa cha Khabarovsk)

Mbiri yake: Apo wakaŵa muchoko, wakatemwanga kwimba sumu, kuseŵera chess na checkers. Wakagwirapo mu unduna wakuwona vya malango na kufufuza milandu

Wakakumana na Ŵakaboni ŵa Yehova pamanyuma pakuti wachita ngozi yikuru. Kusambira Baibolo kukamovwira kuti waleke kusuzgika chomene maghanoghano. Wakabatizika mu 2004. Wakatorana na Olesya mu 2008. Ŵali na ŵana ŵaŵiri

Ivyo Wakayowoya

Kasi mukachita wuli kuti mulutilire kukhozga ubwezi winu na Yehova?

Apo nkhaŵa mu jele ndipo nkhaŵavya Baibolo, nkhayezganga kukumbuka mavesi 10 zuŵa lililose na kughanaghanirapo. Nkhajiŵikiraso vilato pa malurombo ghane: Nkhayezganga kusanga vinthu 10 zuŵa lililose vyakuti nimuwongere Chiuta na vinthu 10 vyakudunjika vyakuti nipemphe. Nkhamukhutuliranga vyose vya mu mtima mwane Yehova.

Nikolay Polevodov

Chaka cha kubabikira: 1970 (Khabarovsk, Chigaŵa cha Khabarovsk)

Mbiri yake: Wakakulira mu mbumba iyo yikasopanga yayi. Wakugwira ntchito ya vya magesi

Wakagomezganga kuti Chiuta kulije, m’paka apo wakasanga ukaboni wakuti waliko nadi kweniso kuti Baibolo likuneneska. Wakabatizika mu 1995. Wakatorana na Tatyana. Ŵali na mwana yumoza

Ivyo Wakayowoya

Apo mukaŵa mu jele, kasi mukafipanga mtima na vichi, ndipo mukachita wuli kuti mutonde suzgo linu?

Nkhafipanga mtima kuti ka nimukhozgenge wuli mwana wane uyo pa nyengo iyo wakaŵa waka na vyaka 10. . . . Ine [pamoza na muwoli wane] tikapanga ndondomeko ya kuchita Kusopa kwa Mbumba sabata yiliyose. Nyengo zinyake nkhalembanga mafumbo ghakuti tisange mazgoro ghake, kudinda vithuzi, panji kulemba matchati. Nyengo zinyakeso nkhasankhanga waka mutu wa nkhani na kuwugaŵa mu mafumbo ghakupambanapambana kuti tidumbiskane. Nkhatumizganga vinthu ivi ku nyumba sabata yiliyose.

Kasi ntchivichi chikumukhorweskani kuti Yehova wamovwirani mu nyengo yakusuzga iyi?

Nkhukumbuka kuti zuŵa linyake apo mulinda wa jele wakiza kuzakatiyendera, wakafika kwa ine uku wakolera buku mu woko lake, ndipo wakati: “Asi ukugomezga mwa Chiuta ŵati? Ŵazga ichi.” Wati wamara waka kuyowoya ivi wakafuma na kuluta. Apo nkhati niwone kuti ka wanipa buku wuli, nkhasanga kuti ni Baibolo la Malemba Ghakupatulika mu Mang’anamuliro gha Charu Chiphya! . . . Ntheura ningati nyengo yose iyo nkhaŵa mu jele, nkhaŵa na mwaŵi wa kuŵazga Baibolo lakung’anamurika makora chomene.

Svetlana Sedova

Chaka cha kubabikira: 1969 (Komsomolsk-on-Amur, Chigaŵa cha Khabarovsk)

Mbiri yake: Adada ŵake ŵakafwa apo wakaŵa na vyaka vitatu, ndipo amama ŵake ŵakafwa apo wakaŵa na vyaka 14. Wakagwiranga ntchito ku fakitare yakupanga vyakuvwara. Pasono wakugwira ntchito ya kupwelelera mu nyumba. Wakutemwa kupanda maluŵa. Mfumu wake wakafwa apo ŵana ŵake ŵakaŵa ŵachali ŵachoko, ndipo walera yekha ŵana ŵanalume ŵaŵiri na mwanakazi yumoza

Apo wakaŵa wachinyamata, wakawamo kuti charu chapasi kweniso chilengiwa chose chikwenera kuti chikalengeka na mlengi wavinjeru. Wakabatizika mu 1984

Ivyo Wakayowoya

Kasi pa nyengo yakusuzga iyi mukalomba vichi?

Nkhamulomba Yehova kuti wanipe nkhongono kweniso kuti waŵape nkhongono ŵabali na ŵadumbu awo nawo ŵakujumpha mu viyezgo vyakuyana waka. Kwambura wovwiri wa Chiuta, tingafiska yayi kuzizipizga vinthu ivyo charu cha Satana chikutichitira.

Nakuti nakhorwa kuti Yehova wali nadi nane pafupi nyengo zose. Mazgu ghake ghakuti: “Uyo ngwakugomezgeka mukuchita nayo mwakugomezgeka.”—2 Samuyeli 22:26.

Tatyana Zhuk

Chaka cha kubabikira: 1973 (Khabarovsk, Chigaŵa cha Khabarovsk)

Mbiri yake: Wakagwirapo ntchito yakusambizga ku sukulu ya mkaka ndipo pasono wakugwira ntchito ya kupwelelera mu nyumba

Apo wakaŵa na vyaka 19, wakanweka chomene na uthenga wa mu Baibolo. Baibolo likamovwira kuti wasange mazgoro gha mafumbo ghakukhwaskana na umoyo agho wakaŵa nagho. Wakabatizika mu 1994. Wakatengwa kwa Vitaliy mu 1994

Ivyo Wakayowoya

Kasi ntchivichi chikamovwirani kuti mtima uŵe m’malo pa nyengo yakusuzga iyi?

Ŵabali na ŵadumbu, pamoza na mfumu wane ŵakanovwira kuti nighanaghanirenge umo vinthu vizamuŵira mu charu chiphya m’malo mwa kughanaghanira waka vya masuzgo agho ghakwiza kunthazi. . . . Ivi vikanovwira chomene.

Nkhamanyanga yayi kuti Yehova wanganovwira kuti mtima wane uŵe m’malo nthena. . . . Apo ŵakasechanga nyumba yithu, yumoza mwa ŵamazaza wakanifumba kuti: “Chifukwa wuli ukuwoneka kuti mtima uli m’malo? Ndikuti wangumanya kale kuti tikwiza?” Nakuti chakukondweska ntchakuti iyo wakamanya yayi umo fumbo lake ili likanikwezgera nkhongono!

Vitaliy Zhuk

Chaka cha kubabikira: 1972 (Khabarovsk, Chigaŵa cha Khabarovsk)

Mbiri yake: Wakugwira ntchito ya kotchelera visulo

Apo wakaŵa na vyaka 20, wakamba kughanaghanira vyakukhwaskana na umoyo. Chifukwa chakuti wakapenjanga unenesko lekani wakamba kusambira Baibolo na Ŵakaboni ŵa Yehova, ndipo wakasanga mazgoro ghakukhorweska gha mafumbo agho wakaŵa nagho. Wakabatizika mu 1994. Kuumaliro wa chaka chenechichi wakatorana na Tatyana

Ivyo Wakayowoya

Kasi mwasambira vichi pa nyengo yakusuzga iyi?

Nasambira kuthemba Yehova m’malo mwa kusuzgika maghanoghano na vinthu ivyo vingazakaniwira kunthazi. Nakuti kanandi ivyo tikufipa navyo mtima vikuchitika yayi. . . . Nasambiraso kuzirwiska chomene ubali withu wauzimu. Pali ŵabali na ŵadumbu ŵakujumpha 8 miliyoni pa charu chose, ndipo wose ŵali pafupi nase chomene. Iwo mbakunozgeka kutovwira kwizira mu malurombo, mazgu ghakukhozga, na wovwiri unyake wakukhumbikwa.

Tikumanya kuti Yehova walutilirenge kukhozga ŵabali na ŵadumbu ŵithu ŵakutemweka aŵa pamoza na ŵanyake ŵanandi awo pasono ŵakupanga “bingu likuru ili la ŵakaboni.”—Ŵahebere 12:1.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI