MAY 6, 2024
RUSSIA

“Yehova Wangatovwira Kuzizipizga Suzgo Lililose”

JULANI

Khoti la Khorolskiy ilo lili ku Chigaŵa cha Primorye sonosono apa lipelekenge chigamuro chake pa mulandu wa Mubali Boris Andreyev, Mubali Anatoliy Li, na Mudumbu Nataliya Sharapova. Wakwimira boma pa milandu wachali wandayowoye chilango icho ŵabali ŵaŵiri aŵa kweniso mudumbu ŵangapika.

Vyakukhwaskana na ŵanthu aŵa

Boris Andreyev

Chaka chakubabikira: 1951 (Monastyrishche, Chigaŵa cha Primorye)

Mbiri yake: Wakagwiranga ntchito yakovwira ŵanthu para kwachitika vyamabuchi

Wakakhorwa kuti wasanga unenesko Ŵakaboni ŵa Yehova ŵati ŵazgora mafumbo ghake kwizira mu Baibolo. Wakabatizika kuŵa yumoza wa Ŵakaboni ŵa Yehova mu 2004

Wakatorana na Aleksandra mu 2020

Ivyo Aleksandra uyo ni muwoli wa Boris wakayowoya

Kasi mfumu winu wamovwirani wuli kuzizipizga mu nyengo ya masuzgo iyi?

Nkhukumbuka zuŵa linyake ilo likaŵa lakusuzga chomene kwa ine Boris wakati wakakika. Nkhongono zikanimalira ndipo nkhamba kulira. Nkhamulembera kalata Boris kumulongosolera ivyo vikachitika kweniso umo nkhajipulikiranga. Kweni Boris pakuzgora wakanikhozga kweniso wakati wakumanya makora umo nkhajipulikiranga. Ndipo chakuzirwa chomene ntchakuti wakanikumbuska masuzgo ghose agho tazizipizga kumanyuma uku na wovwiri wa Yehova. Nakuti nkhakhumbikwiranga nadi kukhozgeka, ndipo nkhakhorwa kuti Yehova watilekenge tekha yayi.

Anatoliy Li

Chaka chakubabikira: 1985 (Uzbekistan)

Mbiri yake: Wakalutapo ku matchalitchi ghakupambanapambana kweni wakasanga yayi mazgoro gha mafumbo agho wakaŵa nagho. Wakakondwa kumanya unenesko wa mu Baibolo wati wamba kusambira na Ŵakaboni ŵa Yehova. Wakabatizika mu 2010

Wakatorana na Raisa mu 2011

Ivyo Raisa uyo ni muwoli wa Anatoliy wakayowoya a

Kasi Yehova wamovwirani wuli imwe na mfumu winu?

Pati pajumpha nyengo yichoko waka apo Anatoliy wakaŵa kuti wali ku jele lakulindilirako awo milandu yawo yinderuzgike, iyo wakaniphalira kuti wakanifipiranga mtima chomene chifukwa nkhaŵa nekha. Pambere wandakakike, tikasambiranga Baibolo na kulombera lumoza zuŵa lililose. Kweni wakaleka kunifipira mtima wati wamanya kuti ŵabali ŵakanovwiranga pakunipa wovwiri wose uwo nkhakhumbikwiranga. Tajiwonera tekha umo Yehova wakutipwelelelera ndipo watilekenge tekha yayi.

Nataliya Sharapova

Chaka chakubabikira: 1972 (Kazakhstan)

Mbiri yake: Wakamba kusambira Baibolo mu chaka cha1995 pamanyuma pakuti wakumana na Ŵakaboni ŵa Yehova. Wakakhorwa kuti Baibolo ni Mazgu gha Chiuta. Wakabatizika mu 2012

Ivyo a Nina awo mbamama ŵa Nataliya ŵakayowoya

Kasi ntchivichi chikumovwira Nataliya kuzizipizga apo wali mu jele lakulindilirako awo milandu yawo yinderuzgike?

Mwana wane wakukumana na masuzgo ghanandi chomene ku jele. Ku malo ghara kukuzizima chomene. Kweniso wakulwara mutu pafupipafupi. Nangauli nyengo zinyake wakugongowa, kweni wakukhorwa kuti Yehova wakumovwira kuzizipizga masuzgo ghake ghose. Iyo wakuti: “Nkhumanya kuti nikhalilirenge kuno ku jele yayi. Yehova wakunovwira kuzikira, ndipo ndine wakunozgeka kulindilira.” Masuzgo agho Nataliya wakukumana nagho ghamupangiska kusendelera kufupi chomene na Yehova. Wakujipulika nga wali mu mawoko gha Yehova.

Nga umo Yehova wachitira na Anatoliy, Boris, na Nataliya, tili na chigomezgo chose kuti Iyo walutilirenge kuzgora malurombo ghithu para takumana na masuzgo ndipo watipenge nkhongono kuti tizizipizge.—Salimo 20:1

Nyengo

July 28, 2022

Ŵakaŵajulira mulandu
October 6, 2022

Ŵakasecha nyumba 12 izo zili mu muzi wa Yaroslavsky. Boris na Nataliya ŵakaŵasunga dankha mu jele
October 7, 2022

Boris na Nataliya ŵakaŵasamuskira ku jele lakulindilirako awo milandu yawo yinderuzgike
October 12, 2022

Anatoliy ŵakamusunga dankha mu jele
October 13, 2022

Anatoliy ŵakamusamuskira mu jele lakulindilirako awo milandu yawo yinderuzgike
October 5, 2023

Khoti likamba kutegherezga mulandu wawo

a Apo nkhani iyi yikalembekanga chikaŵa chakusuzga kuyowoyeskana na Mubali Andreyev, Mubali Li, na Mudumbu Sharapova chifukwa wose ŵakaŵa kuti ŵali mu jele lakulindilirako awo milandu yawo yinderuzgike.

Wonaniso

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI