JULY 7, 2022
RUSSIA

Yevgeniy Zinich Wakulutilira Kugomezgeka kwa Yehova nga Umo Ŵakachitira Ŵapapi ŵake

JULANI

Pa June 27, 2022, Khoti la Oktyabrskiy ilo lili ku Krasnoyarsk likati Mubali Yevgeniy Zinich wakagwire jele vyaka 6. Khoti lati lapeleka waka chigamuro ichi, nyengo yeneyiyo ŵakamujalira.

Nyengo

December 11, 2020

Ŵamazaza ŵakasecha nyumba ya Yevgeniy
January 21, 2021

Ŵamazaza ŵakamujulira mulandu
October 19, 2021

Ŵakati wali na mulandu wakulongozga milimo ya gulu ilo likuchita vinthu vyakofya
October 20, 2021

Ŵakamukanizga kwenda kufuma mu chigaŵa icho wakakhalanga
December 14, 2021

Khoti likamba kutegherezga mulandu wake

Vyakukhwaskana na munthu uyu

Yevgeniy Zinich

Chaka cha kubabikira: 1966 (Nazarovo, Chigaŵa cha Krasnoyarsk)

Mbiri yake: Ŵapapi ŵake na agogo ŵake ŵakatambuzgikapo chifukwa cha chipulikano chawo mu nyengo ya muwuso wa Soviet

Wakabatizika na kuŵa Kaboni wa Yehova mu 1982. Wakatorana na Mariya mu 1988, ndipo ŵali na mwana yumoza mwanakazi. Mariya wakafwa pambere khoti lindadumure mulandu wake

Ivyo Wakayowoya

Ŵapapi ŵinu na agogo ŵinu, kweniso ŵapapi ŵa muwoli winu ŵakatambuzgikapo chifukwa cha chipulikano chawo. Kasi chiyelezgero chawo chamovwirani wuli?

Pa nyengo iyo, chikaŵa chachilendo yayi kuwona Ŵakaboni ŵa Yehova ŵakutambuzgika. Nkhasambira vinandi chomene pakuwona umo ŵapapi ŵane na agogo ŵakachitira apo ŵakatambuzgikanga. Ŵakakwiyapo yayi nesi kuŵasungira vyakusingo awo ŵakaŵatambuzganga. Waliyose wakapulikiskanga kuti wakwenera kutambuzgika chifukwa cha kuŵa Mkhristu waunenesko. Para nkhughanaghanira chiyelezgero cha ŵapapi ŵane, nkhuwona kuti chipulikano chawo chikajintha pa kumanya makora unenesko na ubwezi wawo na Chiuta. Chinthu chimoza icho nkhukumbuka kuti nkhawonanga adada ŵakuchita apo nkhaŵa muchoko, nkhuŵawona adada ŵagwada pasi ŵakulomba kufumira pasi pa mtima.

Ningati ndivyo ŵakachitangaso ŵapapi ŵa muwoli wane, Mariya. Unenesko wa mu Baibolo ukaŵa waka umoyo wawo. Ŵakamovwira muwoli wane kuti waŵe na chipulikano chakukhora, waŵazgenge Baibolo nyengo zose, kweniso kuti wachitirenge lusungu ŵabali na ŵadumbu mu mpingo. Nanga ni apo wakaŵa kuti wakhala pachoko waka kufwa, pa nyengo iyo wakapokeranga wovwiri wa ku chipatala, wakalutilira kuŵa na mtima wakovwira ŵanji kuti ŵakhozge chipulikano chawo mwa Yehova. Wakanikumbuskanga vya ŵanji awo ŵakakhumbikwiranga kukhozgeka.

Ntchivichi chamovwirani kuzizipizga masuzgo ghose agha?

Khumbo lakuti nilutilire kuchitako ntchito ya Yehova na kovwira ŵabali na ŵadumbu ŵane, ndilo likunikhukiska kuti nileke kugongowa. Nkhajipeleka kuchita chilichose icho ningafiska kuti novwire ŵabali ŵanandi awo ŵali mu jele. Chikaŵa chakukondweska chomene kuwona kuti Yehova wakunigwiliskira ntchito kuti niŵawovwire, ndipo ivi vikanovwira kujiwona kuti ndine wakukhumbikwa. Vikanisambizgaso umo Yehova wakovwilira waliyose wa ise payekha.

Para nkhughanaghanira vya lusungu na mtima wa kupa uwo ŵabali na ŵadumbu ŵanilongora, vikunovwira kusimikizga fundo yakuti Yehova wakunitemwa ndipo wakukondwa nane. Nakuti nkhukhozgeka chomene na lusungu ulo ŵakunilongora, chomenechomene mu myezi iyi, chifukwa nili na chitima cha kutayika kwa muwoli wane Mariya.

Tikugomezga kuti Yehova walutilirenge kumulongora chitemwa na kumupembuzga Yevgeniy, apo wakulutilira kuzizipizga na kulongora chikanga mu nyengo zakusuzga nga umo ŵakachitira ŵapapi ŵake kumasinda.—Salimo 86:17.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI