Pa May 3, 2018, Khoti la mu Msumba wa Saint Petersburg lizamupulika apilu iyo Ŵakaboni ŵa Yehova ŵali kuchita kususkana na ivyo khoti linyake lili kudumura kuti boma lipoke ofesi yawo yakale ku Russia. Usange Ŵakaboni ŵaluza pa apilu iyi, mbwe ivyo khoti lakwamba likadumura vigwirenge ntchito, ndipo Boma lingapoka ofesi iyi nyengo yeneyiyo.

Kukwambilira, Khoti la ku Sestroretskiy likasulako ukaboni wakuti ofesi ya Ŵakaboni iyi nja Watch Tower Bible and Tract Society of Pennsylvania (WTPA), wupu uwo ofesi yake yikuru yili ku United States. Wupu wa WTPA wakhala na ofesi iyi kweniso kulipira msonkho vyaka 17. Ndipouli, pa December 7, 2017, khoti lichoko ili likati vikalata vya wenelero wa WTPA pa malo agha ni vyambura kwenelera. Usange Ŵakaboni ŵaluza apilu iyi na kuyezga nthowa zose mu Russia na kutondeka, mbwenu nkhani iyi ŵayitolerenge ku Khoti Lakuwona vya Wanangwa wa Ŵanthu ku Europe.

Mulandu uzamwamba nyengo ya 11:30 a.m. pa May 3, 2018, mu Khoti la mu Msumba wa Saint Petersburg, ul. Basseynaya, 6, St. Petersburg, Russia.