Unduna wa vya Malango ku Russia ukukhumba kukachita chipikisheni ofesi ya Ŵakaboni ŵa Yehova mu charu ichi. Kuyana na ivyo wakayowoya uyo wakwimira boma pa nkhani za milandu, Unduna uwu ukamanyiska Ŵakaboni ŵa Yehova pa February 1, 2017, kuti uchitenge chipikisheni ofesi yawo kwambira pa February 8 m’paka 27. Unduna wa vya Malango ukati ukukhumba kumanya vya katundu uyo Ŵakaboni ŵa Yehova ŵali nayo, ndalama izo ŵakugwiliskira ntchito, umo gulu ili lili, ivyo ŵakusambira, na ivyo ŵakusambizga. Pa February 15, 2017, ofesi ya Ŵakaboni ŵa Yehova yikapeleka madokyumenti ghakujumpha 73,000 ku unduna uwu.

Iwo ŵakukhumba kuchita chipikisheni ichi chifukwa cha ivyo khoti la Moscow City likadumura kuyana na ivyo uyo wakwimira boma pa nkhani za milandu wakayowoya. Mu March 2016, uyo wakwimira boma pa nkhani za milandu wakachenjezga Ŵakaboni ŵa Yehova kuti boma likukhumba kujara ofesi yawo chifukwa chakuŵaghanaghanira kuti ŵakuchita vinthu mwakutalulira. Kufuma waka panyengo iyi, makhoti ghanandi mu vigaŵa vinyake vya ku Russia ghakudumura kuti mawupu gha Ŵakaboni ŵa Yehova ghamare. Nangauli makhoti ghakudumura nthena kweni ghalije ukaboni wakuti Ŵakaboni ŵa Yehova ŵakuchita nadi vinthu mwakutalulira.

Pakughanaghanira vya chipikisheni ichi, Ŵakaboni ŵa Yehova ku Russia ŵakufipa mtima chomene kuti nyengo yiliyose ofesi yawo yingajalika. Charu cha Russia chikupeleka yayi wanangwa wakusopa ku Ŵakaboni ŵa Yehova. Ivi vikulongora kuti latondeka kulondezga malango agho vyaru vili kukolerana pa nkhani ya wanangwa wa ŵanthu.