Pa February 22, 2018, Mweruzgi Aleksey Rudnev, wa Khoti la Zheleznodorozhniy ku Oryol, wakadumura kuti Dennis Christensen ŵamusunge dankha mu jele m’paka pa August 1, 2018. Christensen ŵakumupa mulandu wa kwendeska milimo ya gulu lachisopa ilo boma likuti likuchita vinthu mwakutalulira. Nakuti apo ŵakamukakanga wakaŵa kuti wali pa ungano Wachikhristu uwo pakiza ŵapolisi mwamabuchi mu May 2017.

Mulandu uwu ŵakawupulikizga kakwamba pa February 19, ndipo pa nyengo iyi mweruzgi wakayowoya kuti wazamudumura makora pa fundo izo magulu ghose ghaŵiri ghakayowoya. Ndipouli, pakupulikizga nkhani iyi pa February 22, mweruzgi wakakana fundo zose izo maloya gha Christensen ghakayowoya ndipo wakadumura kuti ŵasazgireko nyengo yakumusungira mu jele pambere mulandu wake underuzgike. Mulandu uwu uzamwamba kweruzgika pa February 26 nyengo ya 2:30 p.m.

Ŵakaboni ŵa Yehova pa charu chose ŵakufipira mtima umoyo wa Christensen ndipo ŵakulomba kuti muwoli wake, Irina, walutilire kuzizipizga. Christensen wakhala kale mu jele myezi 9 kwambura kweruzgika.