Unduna wa vya Malango mu charu cha Russia wamangara ku Khoti Likuru Chomene kuti “likanizge Ŵakaboni ŵa Yehova kupharazga na kusopa, kweniso kujara ofesi yawo chifukwa chakuŵaghanaghanira kuti ŵakuchita vinthu mwakutalulira chomene.” Pa March 15, 2017, ŵakhoti ŵakaphalira ŵanthu pa webusayiti yawo kuti ŵali kupokera dandawuro kufuma ku Unduna uwu. Ofesi ya Ŵakaboni ŵa Yehova yikapokera chisamani chakuti khoti lamupulikizga mulandu uwu pa April 5, 2017, nyengo ya 10:00 a.m.

Usange khoti lingazomerezga ivyo Unduna uwu wapempha, Ŵakaboni ŵa Yehova ŵasuzgikenge chomene ku Russia. Ŵaluzenge katundu wawo munandi ndipo mawupu agho ŵakugwiliskira ntchito ghamalenge. Kweniso Ŵakaboni ŵa Yehova ŵakujumpha 170,000 ŵaŵajalirenge mu jele chifukwa cha kusopa, kuŵerenga Baibolo, na kuphalira ŵanyawo ivyo ŵakugomezga.

Vasiliy Kalin, uyo wakwimira ofesi ya Ŵakaboni ŵa Yehova ku Russia, wakati: “Tikukhumba kuti tisopenge Yehova mwamtende. Kwa vyaka vyakujumpha 100, boma la Russia likulondezga yayi malango ghake agho ghakutipa wanangwa wakusopa. Apo nkhaŵa munyamata, Stalin wakakaka na kutumizga banja lithu ku Siberia chifukwa chakuti tikaŵa Ŵakaboni ŵa Yehova. Ntchachitima kuti ŵana na ŵazukuru ŵane nawo ŵakusangana na suzgo ili. Nkhamanyanga yayi kuti boma la Russia lingalutilira kusuzga Ŵakaboni ŵa Yehova m’paka sono.”