Kwambira pa December 15 m’paka 31, 2022, Ŵakaboni ŵa Yehova nawo kakwamba ŵakawoneska vinthu vyawo pa chiwoneskero cha pachaka ku Senegal chakumanyikwa kuti Dakar International Fair (FIDAK). Chiwoneskero ichi chikaŵa cha nambara 30. Pa chiwoneskero ichi pakaŵa vinthu vyakuŵajaŵaja, ntchito zakupambanapambana zakovwira ŵanthu, kweniso vinthu vyakuwoneska mitheto ya mu charu ichi. Pa chakuchitika ichi pakaŵa ŵanthu ŵanandi ŵakufuma muno mu Africa kweniso mu vyaru vinyake awo ŵakakopeka.

Ŵabali na ŵadumbu ŵithu ŵakanozga kanyumba umo ŵakawoneskerangamo vinthu vya pa jw.org kweniso ŵakaŵa na mabuku ghakovwira mabanja. Ŵapharazgi ŵakawoneskanga mavidiyo kufuma pa chigaŵa chikuti, Ŵani Ŵabwezi ŵa Yehova, na Mavidiyo gha Makatuni kweniso mavidiyo ya pa chigaŵa cha ŵanyamata na ŵasungwana Ivyo Ŵanyinu Ŵakuyowoya.

Ŵalendo ŵanandi ŵakayimanyanga makora yayi webusayiti yithu, ndipo panyengo iyi wakajura pa foni zawo apo ŵakaŵa pa kanyumba aka. Ŵanandi ŵakazizwa kumanya kuti pa jw.org, pali viyowoyero yakujumpha 1,000 kusazgapo Chiwolof icho ntchiyowoyero cha ku malo agha. Mabuku ghakujumpha 3,000 ghakapelekeka ku ŵalendo awo ŵakapempha.

Mulendo munyake wakayowoya kuti, “Nyengo ivyo tamalira pa kanyumba kinu aka ndiyo yaŵa yakuzirwa chomene kuluska vyose ivyo tawona pa chiwoneskero ichi.” Munyake wakayowoyaso kuti, “Vikaŵenge kuti ŵakupeleka mphaso, mphanyi imwe ndimwe mwawina.”

Mubali Martin Laud, uyo wakawovwirako pakunozga kanyumba aka wakayowoya kuti: “Chikaŵa chinthu chakukondweska chomene kupokelera ŵalendo ŵanandi kufuma mu vyaru vyakupambanapambana. Ŵanandi mwa ŵalendo aŵa, ŵakatiwonga chomene chifukwa chakuti ŵakapokera mabuku kwaulere agho ghali na ulongozgi wakovwira wakufuma mu Baibolo.”

Tili ŵakukondwa chifukwa cha vinthu viwemi ivyo vikachitika kufuma pa upharazgi uwo tikachitako pa nyengo ya chiwoneskero cha pa chaka ichi. Iyi ni nthowa yinyake iyo ŵanthu ŵa Chiuta ŵakupharazgira “vinjeru” vyakufuma kwa Chiuta.—Zintharika 3:21, 22.