Chiwoneskero cha nambara 66 chikachitikira ku Belgrade, Serbia, kuyambira pa October 21 kufika pa 29, 2023. Ŵanthu ŵakujumpha 190,000 ŵakaŵapo pa chakuchitika ichi. Ŵakaboni ŵa Yehova ŵakanozga kanyumba ako kakalongosoranga za kuzirwa kwa Mazgu gha Chiuta. Ŵabali na ŵadumbu ŵakujumpha 100 ŵakawovwira ŵalendo mwakuŵalongora umo ŵangasangira mazgoro gha mafumbo ghakuzirwa.

Mwanakazi munyake wakiza ku kanyumba aka ndipo wakaphalira mudumbu kuti wali na mafumbo ghanandi ghakukhwaskana na Baibolo. Wakakondwa kuti wakasangana na munthu uyo wakamovwira kusanga mazgoro gha mafumbo ghake. Ŵakapanga manozgero kuti ŵalutilire kudumbiskana.

Munyamata munyake wakapoka burosha la mutu wakuti, Kasi Vyamoyo Vikachita Kulengeka? Iyo wakayowoya kuti nangauli wakugomezga kuti Chiuta waliko, kweni wakati vikumusuzga kupulikiska kuti ndiyo wakalenga vinthu vyose. Mwachiyelezgero, iyo wakamanyanga makora yayi usange Baibolo likusambizga kuti Chiuta wakalenga vinthu vyose mu mazuŵa 6 pera. Kweni wakakondwa chomene apo Ŵakaboni ŵa Yehova ŵakamulongora nkhani pa jw.org iyo yikakolerana na fumbo lake.

Ŵasungwana ŵaŵiri ŵakakondwa chomene wakati ŵawona mabuku gha Mayankho a Zimene Achinyamata Amafunsa—Buku Loyamba ndi Lachiwiri. Iwo ŵakakondwa chomene ŵakati ŵawona kuti mu mabuku agha muli nkhani zakuzirwa nga umo ŵachinyamata ŵangasangira ŵabwezi ŵanadi, ivyo ŵangachita kuti ŵachitenge makora ku sukulu, kweniso kupambaniska pakati pa chitemwa chanadi na kuyeyeka waka. Yumoza wa ŵasungwana aŵa wakayowoya kuti: “Mabuku agha ngawemi chomene. Tamughaŵazga kwambura kutondeka!”

Tikuŵawonga chomene ŵabali na ŵadumbu ŵithu ku Belgrade chifukwa cha kuŵikapo mtima kovwira ŵanthu pa chiwoneskero cha mabuku. Mphanyi Yehova waŵatumbika chifukwa cha kuŵikapo mtima kupharazga “pakweru zina lake.”—Ŵahebere 13:15.