Kufuma pa May 17 m’paka pa 26, 2024, ŵabali na ŵadumbu ŵakujumpha 600 ŵakufuma ku Serbia na Montenegro ŵakachitako upharazgi wapadera wa mu vigaŵa vya kutali ku Serbia. Uwu ngupharazgi wapadera wakwamba kuchitika na Ŵakaboni ŵa Yehova, maso na maso ku Serbia pamanyuma pa vyaka vyakujumpha 20. Ŵanthu pafupifupi 1.5 miliyoni ŵakukhala mu vigaŵa vya ku mizi ivyo ŵabali ŵithu ŵakupharazgako viŵi yayi. Chakukondweska ntchakuti pa nyengo ya upharazgi wapadera uwu ŵanthu ŵakujumpha 1,800 ŵakapempha kuti ŵasambirenge Baibolo.

Mu tawuni ya Beli Potok, mwanakazi munyake wakakondwa chomene na ivyo wakadumbiskana na Ŵakaboni Yehova. Ntheura wakimbira foni ŵazengezgani ŵake na kuŵaphalira kuti: “Kwizenge ŵanthu awo ŵazamumuphalirani vya Chiuta na Baibolo. Muzakaŵategherezge chomene.” Mwanakazi munyake uyo wakukhala mu nyumba ya umaliro mu muzi uwu wakalindiliranga Ŵakaboni mwakunweka ndipo wakakondwa chomene kudumbiskana nawo. Mwanakazi uyu wakati ulendo unyake wakiza ku Chikumbusko cha nyifwa ya Yesu. Pamanyuma mwanakazi uyu wakazomera kuti ŵasambirenge nayo Baibolo

Ulendo unyake Ŵakaboni ŵaŵiri ŵakapharazganga pa tumashelufu mu tawuni ya Smederevska Palanka, mbwenu ŵakasangana na mwanalume munyake zina lake Radomir. Mwanalume uyu wakati wakaŵa wakukondwa chomene kuwona ŵanthu awo ŵakugomezga mwa Chiuta mu tawuni yakwake. Kufuma apo wakafumba za mazgu agho ghakulembeka pa tumashelufu ghakuti, kusambira Baibolo kwaulere. Ŵabali ŵati ŵamulongosolera umo tikuchitira pakusambira na munthu Baibolo, Radomir wakazomera kwamba kusambira Baibolo.

Upharazgi wapadera uwu ukaŵa thumbiko likuru ku ŵabali na ŵadumbu ŵithu ku Serbia na ku wose awo ŵakukhumba kusambira unenesko wa mu Baibolo.—Yohane 7:37.