Pa April 26, 2020, ŵapharazgi ŵakujumpha 2,000 awo ŵakuyowoya Chikiriyo ku Sierra Leone ŵakakondwa chomene na kufumiskika kwa Baibolo la Malemba Ghakupatulika Mu Mang’anamuliro Gha Charu Chiphya Mateyu-Uvumbuzi, mu chikiriyo.

Ŵabali ŵithu ŵakawungana pamoza yayi pa nyengo yakufumiskika kwa Baibolo ili, chifukwa boma lili kukanizga kuti ŵanthu ŵanandi ŵawunganenge pamoza kuti muliri wa coronavirus uleke kuthandazgika. Kweniso chikaŵa chakusuzga kuti ŵabali ŵithu ŵawonelere ungano uwu apo ukachitikanga, chifukwa ŵapharazgi ŵanandi ku Sierra Leone, chomenechomene awo ŵakukhala mu misumba yichokoyichoko ŵalije vyakuwonelerapo.

Pamanyuma, Komiti ya Minthavi ya Liberia iyo yikulaŵilira umo ntchito yithu yikwendera ku Sierra Leone, yikapempha ku Komiti ya Kusambizga ya Wupu Wakulongozga, kuti ŵayizomelezge kuwoneska pulogiramu iyi mwakudumura. Ntheura ŵapharazgi ŵakaphalirika kuti ŵapulikizge pulogiramu yapadera pa wayilesi panji ŵawonelere pa TV, kweni ŵakaphalirika yayi kuti kufumiskikenge Baibolo.

Kwati kwakhala mazuŵa ghachoko waka kuti ungano uwu uchitike, ŵapharazgi ŵakapokera manevulupu ghakujalika makora agho mukati mwake mukaŵa Baibolo. Pa manevulupu agha ŵakalembapo kuti kujura yayi m’paka apo muzamuwonelelera pulogiramu yapadera.

Baibolo ili lati lafumiskika, Mudumbu Megan Diaz, uyo wali ku chigaŵa uko kukukhumbikwa ŵapharazgi ŵanandi ku Sierra Leone, wakati: “Sambiro lane la Baibolo likaniyimbira foni na kuniphalira kuti likategherezga nkhani yakufumiska Baibolo. Likakondwa chomene kuti Yehova wawovwira kuti Baibolo ili ling’anamurike mu chiyowoyero chake. Ndipo likati ndilo tizamugwiliskira ntchito namachero pakusambira Baibolo.”

Tounkara wakusambira Baibolo ndipo wakuyowoya Chikiriyo. Iyo wakati: “Kufumiskika kwa Baibolo la Malemba Ghakupatulika Mu Mang’anamuliro Gha Charu Chiphya Mateyu-Uvumbuzi mu Chikiriyo, mbukaboni wakukwana wakuti Yehova wakukhumba waliyose wapulike uthenga wake. Iyo wakukhumba kuti ŵapapi ŵasambire uthenga wake na kuwupulikiska makora mwakuti ŵasambizge makora ŵana ŵawo. Nili wakukondwa chomene chifukwa cha kufumiskika kwa Baibolo ili mu chiyowoyero chithu.”

Mazgu ghanandi gha Chikiriyo ghakufuma ku Chingelezi ndipo ŵanthu ŵanandi ku Sierra Leone ŵakuyowoya chiyowoyero ichi. Ŵabali ŵatatu na mudumbu yumoza ndiwo ŵakang’anamura Baibolo la Malemba Ghakupatulika Mu Mang’anamuliro Gha Charu Chiphya Mateyu-Uvumbuzi mu Chikiriyo kwa vyaka viŵiri na hafu. Pa Mande, apo pakaŵa pa 27 April, Baibolo ili likamba kusangika pa jw.org kuti ŵanthu ŵachite dawunilodi.

Pamoza na ŵabali na ŵadumbu ŵithu ku Sierra Leone, tikuwonga chomene Yehova chifukwa cha Baibolo la Malemba Ghakupatulika Mu Mang’anamuliro Gha Charu Chiphya Mateyu-Uvumbuzi mu Chikiriyo. Baibolo ili, ‘ntchawanangwa chiwemi na chakufikapo’ chakufuma kwa adada ŵithu ŵakuchanya, Yehova.—Yakobe 1:17.