Ŵajalirika mu Jele Chifukwa cha Chipulikano Chawo

JULANI

Ŵanyamata 11 awo Mbakaboni ŵa Yehova ŵali kujalirika mu jele ku Singapore chifukwa chakuti njuŵi yawo yikuŵazomerezga yayi kugwira ntchito zausilikari. Pa ŵanyamata aŵa, 5 ŵakugwira jele ulendo wachiŵiri chifukwa chakuti ŵakulutilira kukana kunjira usilikari ŵati ŵagwirapo kale jele. Ŵanyamata aŵa ŵalije chakuti ŵangachita chifukwa dango la charu cha Singapore, likuti waliyose wakwenera kunjirapo usilikari ndipo likuzomerezga yayi vyakuti munthu wangakana usilikari kuyana na njuŵi yake.

Ku Singapore, para munyamata wakwaniska vyaka 18, wakwenera kunjira usilikari. Usange wakukana chifukwa cha njuŵi yake, ŵakumutora na kumujalira ku kampu ya ŵasilikari myezi 15. Para myezi iyi yajumpha, ŵakumufumiska ndipo nyengo yeneyiyo ŵakumupa yunifomu yausilikari kuti wavware na kwamba kusambizgika usilikari. Usange wakanaso, khoti la ŵasilikari likudumura kuti wajalirikeso myezi yinyake 30.

Ivi vikung’anamura kuti ŵanyamata awo Mbakaboni ŵa Yehova awo ŵakukana ntchito zausilikari chifukwa cha njuŵi yawo, ŵakujalirika maulendo ghaŵiri, m’paka myezi 45.

Charu cha Singapore Chikukana Kulondezga Ivyo Wupu wa UN Uli Kuyowoya

Wupu wa United Nations ukamba nikale kupempha mamembara ghake kuti “ghakumbukenge kuti para munthu wakukana usilikari ndikuti wakulondezga wanangwa wake wa kuchita vinthu kuyana na maghanoghano ghake, njuŵi na chisopa uwo uli mu phangano la Universal Declaration of Human Rights.” Nangauli charu cha Singapore ni membara wa wupu uwu kwambira mu 1965, kweni pa nkhani iyi chalongora kuti chikususkana na United Nations. Mu kalata ya pa April 24, 2002, yakuluta ku wupu wa UN Commission on Human Rights, mulara wa boma munyake wakayowoya kuti “usange ivyo munthu wakugomezga panji kuchita vikususkana [na wanangwa wa chivikiliro cha charu], wanangwa wa boma wakukhozga chivikiliro cha charu ndiwo ukwenera kulondezgeka.” Munthu uyu wakalemba mwambura kubisa kuti, “Tikukolerana nayo yayi fundo yakuti munthu ni mwanangwa kukana usilikari chifukwa cha njuŵi yake.”

Nkhani ya Munthu Uyo ni Kayidi Chifukwa cha Njuŵi Yake

Azariah Wa Ca Leb

Azariah Wa Ca Leb wakababika pa July 29, 2000. Ŵapapi ŵake ŵakamusambizga fundo za mu Baibolo kufuma apo wakaŵa muchoko. Wakachemeka kuti wakanjire usilikari pa November 15, 2019, nga chigaŵa cha ntchito ya boma iyo wakwenera kugwira.

Chifukwa chakuti wali kumanya fundo yakuti Chiuta wakutinkha chomene nkhaza, njuŵi yake yakusambizgika Baibolo yikumuzomerezga yayi kuti wachiteko ntchito yiliyose ya vyausilikari. Ivi vikapangiska kuti ŵamukake, ndipo khoti la ŵasilikari likeruzga kuti ŵamusunge mu jele myezi 12. Apo wakawonekera kakwamba ku khoti ili, wakalongosora makora kuti ngwakunozgeka kugwira ntchito zinyake padera pa usilikari, kuti nayo wawovwirepo pa ntchito za boma.

Azariah wati wamalizga waka myezi 12 iyo wakapika pa November 12, 2020, mulara munyake wa ŵasilikari wakamuchichizga kuti wavware yunifomu ya usilikari. Wati wakana mwantchindi kuchita nthena, wakapikaso mulandu ndipo ŵakamukaka kachiŵiri.

Azariah wakeruzgika na khoti la ŵasilikari pa January 7, 2021. Wakapika chilango chakuti wakhale mu jele myezi 18. Pamoza tingati wapika chilango cha kukhala mu jele myezi 30 chifukwa cha kukana kunjira usilikari. Vikuwoneka kuti wazamufuma mu jele pa May 11, 2022.

Nyengo

April 14, 2021

Ŵakaboni ŵa Yehova 11 ŵali kujalirika mu jele chifukwa cha kukana kunjira usilikari chifukwa cha njuŵi yawo.
April 24, 2002

Mulara wa boma wakati mu malango gha charu cha Singapore mulije vyakuti munthu ni mwanangwa kukana kunjira usilikari.
February 1995

Ŵakaboni ŵa Yehova ŵanandi ŵa mu charu cha Singapore ŵakaŵachichizganga kunjira usilikari pamanyuma ŵakaŵakakanga.
August 8, 1994

Khoti likuru ku Singapore likakana apilu iyo Ŵakaboni ŵakachita.
January 12, 1972

Boma la Singapore likawuskamo Ŵakaboni ŵa Yehova mu kawundura wa visopa vyakuzomerezgeka

Panji Mungatemwa Kuŵerengaso Nkhani Izi

NKHANI

Ŵakaboni ŵa Yehova Ŵakujalirika mu Jele Chifukwa cha Chipulikano Chawo—Kuyana na Malo

Uko Ŵakaboni ŵa Yehova ŵakujalirika mu jele, nyengo zinyake kutombozgeka, chifukwa cha kuchita ivyo ŵakugomezga kweniso kulondezga wanangwa wawo wakubabika nawo.

NKHANI