Pa December 18, 2021, Baibolo lakunozgekaso la Malemba Ghakupatulika mu Mang’anamuliro gha Charu Chiphya likafumiskika mu Chisloveniya. Mubali Gerrit Lösch wa mu Wupu Wakulongozga ndiyo wakapharazga vya kufumiskika kwa Baibolo ili mu pulogiramu iyo yikajambulikirathu ndipo ŵanthu pafupifupi 2,000 ŵakawonelera. Baibolo ili likafumiskika la pa intaneti pera, lakuchita kupulinta lambenge kusangika mu 2022.

Baibolo la mu Chisloveniya likamba kusangika mu 1584. Mu chaka ichi kukafumiskika Baibolo la Dalmatin ilo likaŵa lakwamba lanthunthu la mu chiyowoyero ichi. Pasono vikupulikikwa kuti kuli waka Mabaibolo 80 gha Dalmatin, kusazgapo na ilo lili ku myuziyamu ya Baibolo ku Likuru la Ŵakaboni ŵa Yehova ku Warwick, New York, U.S.A.

Mu 1925, Mubali Franz Brand, uyo wakaŵa Msambiri wa Baibolo, wakamba kupharazga ku ntchito kwake, malo ghakumetera agho ghakaŵa ku Maribor, Slovenia. Mu chaka chenechichi, kagulu kachoko waka ka ŵanthu kakamba kukumana pamoza kuti kadumbiskanenge Malemba. Mu 1930, Ŵasambiri ŵa Baibolo ku Slovenia ŵakajura ofesi yakuti yovwirengepo pa ntchito yakusambizga Baibolo mu charu ichi. Ŵabali ŵithu ŵakafiska chinthu chapadera mu 2009 apo Mubali Samuel Herd wa mu Wupu Wakulongozga wakapharazga vya kufumiskika kwa Baibolo la Mang’anamuliro gha Charu Chiphya pa ungano wa chigaŵa uwo ukachitikira ku Ljubljana, Slovenia.

Mu nyengo ya Nkhondo Yachiŵiri ya pa Charu Chose na vyaka vyakulondezgapo, Ŵakaboni ŵa Yehova ku Slovenia ŵakatambuzgikanga chomene, pakwamba na chipani cha Nazi, kufuma apo ŵamazaza ŵa mu charu chawo. Pa nyengo iyi ŵabali ŵanandi ŵakajalirika mu jele ndipo ŵanyake ŵakakomekanga. Mu 1953, vinthu vikasintha ndipo ŵamazaza ŵakaŵazomerezga Ŵakaboni ŵa Yehova ndipo ŵakati nawo ŵali na wanangwa wa kusopa. Pasono ku Slovenia kuli ŵapharazgi 1,757.

Tikugomezga kuti ŵabali na ŵadumbu ŵithu ku Slovenia ŵangakolerana na mazgu agho Mubali Lösch’s wakayowoya pa pulogiramu ya kufumiska Baibolo iyi, wakati: “Sambirani umo mungagwiliskira ntchito Baibolo liphya ili mwaluso, mwakuti musange chandulo na uthenga wake! . . . Baibolo lakunozgekaso la Malemba Ghakupatulika mu Mang’anamuliro gha Charu Chiphya ilo lafumiskika mu Chisloveniya limovwiraninge kuti mukoleske ‘mazgu ghakugomezgeka’!”—Tito 1:9.