Awo ŵakovwira ŵanthu ŵakumangwa ku South Africa, ŵakalumba Ŵakaboni ŵa Yehova chifukwa cha kovwira ŵanthu ŵakumangwa kuti nawo ŵaŵe na umoyo uwemi pa kufumiska mavidiyo ghawemi chomene mu Chiyowoyero cha Mawoko cha ku South Africa. Ivi vikayowoyeka pamanyuma pakuti Ŵakaboni ŵafumiska mabuku gha mu Baibolo la Malemba Ghakupatulika mu Mang’anamuliro gha Charu Chiphya, Mateyu-Uvumbuzi gha Ŵagalatiya na Ŵaefeso mu Chiyowoyero cha Mawoko cha ku South Africa pa November 15, 2021. Mabuku agha ghakwaniska mabuku 10, agho ghali kufumiskika mu Chiyowoyero cha Mawoko cha ku South Africa. Vikuwoneka kuti mabuku ghanyake ghanayi ghafumenge mu April 2022. Mabuku ghose agha ghakusangika pa jw.org na JW Library Sign Language app.

Pakuyowoya vya Ŵakaboni ŵa Yehova, Minna Steyn, uyo wakuwona vya masambiro kweniso ni mulongozgi ku Western Cape Government, wakati: “Nkhukondwa chomene kuwonelera ŵanthu aŵa ŵakuyowoya chiyowoyero cha mawoko, ndipo nkhukhumba kuŵawonga iwo pamoza na gulu lawo chifukwa chakuti mavidiyo ghawo ngawemi chomene kweniso ŵakughapanga mwapachanya chomene.”

Bongani Makama, uyo ni pulezidenti wa wupu wa Federation of the Disabled ku Eswatini, wakati: “Tikuŵawonga chomene Ŵakaboni ŵa Yehova chifukwa cha kuŵikapo mtima kuti ŵanthu ŵakumangwa nawo ŵaŵe na vinthu ivyo ŵanthu awo ŵalije suzgo ili ŵali navyo.” Wakasazgiraposo kuti: “[Ŵanthu ŵakumangwa] nawo ŵakwenera kuŵa na Baibolo mu chiyowoyero chawo. Lekani tikuŵawonga Ŵakaboni ŵa Yehova chifukwa cha kufumiska mabuku gha mu Baibolo agha mu chiyowoyero cha pamtima cha ŵanthu ŵakumangwa. Tikulindilira waka mwakunweka kuti tizakaŵe na mabuku ghose 66 gha mu Baibolo mu chiyowoyero cha mawoko.”

Pafupifupi ŵanthu 450,000 ku South Africa ŵakugwiliskira ntchito Chiyowoyero cha Mawoko cha ku South Africa. Pali ŵapharazgi 283 ŵakumangwa panji kuti awo ŵakusuzgika kupulika ku South Africa. Chifukwa cha kuyezgayezga uko Ŵakaboni ŵakuchita, “ŵanthu ŵa mitundu yose” ŵakumanya makora unenesko, kusazgapo na ŵanthu ŵakumangwa ku chigaŵa cha ofesi ya munthavi ya South Africa.—1 Timote 2:4.