Dipatimenti Yakuwona vya Mapulani na Kuzenga ku South Africa sonosono apa yimalizgenge kunozga nyumba iyo yili ku Durban umo muzamuŵa ofesi yakung’anamulirako mabuku ya Chiyowoyero cha Mawoko cha ku South Africa. Ofesi yikagura nyumba iyi mu March 2020 ndipo pati pajumpha nyengo yichoko waka yikaguraso nyumba zinyake zapafupi. Awo ŵakuchita mulimo wakung’anamura ŵasamukirenge mu nyumba izi mu May 2022.

Pa ofesi iyi pakuteŵetera ŵanthu 17 awo ŵakukhala penepapo na ŵanyake 25 awo ŵakugwilira ku nyumba kwawo. Ofesi iyi yiŵawovwirenge kuti ŵagwire makora ntchito yakung’anamura mabuku ghithu agho ghakovwira ŵapharazgi 283 ŵakumangwa na awo ŵakusuzgika kupulika kweniso ŵanthu 450,000 awo ŵali na suzgo lenelili mu charu ichi. Ŵanthu ŵanandi awo mbakumangwa panji ŵali na suzgo lakupulika ku South Africa ŵakukhala mu chigaŵa cha KwaZulu-Natal. Durban ndiwo ni msumba ukuru mu chigaŵa ichi.

Mubali Sibusiso Mzizi, uyo wakugwira lumoza na awo ŵakung’anamura mabuku mu Chiyowoyero cha Mawoko cha ku South Africa wakati: “Tili na chigomezgo chose kuti ofesi yiphya iyi yiwovwirenge chomene pa ntchito ya kupharazga mu chigaŵa cha chiyowoyero ichi kuno ku South Africa ndipo yikhozgenge mipingo.”

Tikuwonga Yehova chifukwa cha kutumbika milimo yithu mu Chiyowoyero cha Mawoko cha ku South Africa kweniso chifukwa cha kovwira kuti ntchito iyi yilute panthazi.—Salimo 127:1.