Pa March 7, 2021, ŵapharazgi awo ŵakuyowoya Chikwangali, Chisepulana, na Chisetswana ku South Africa ŵakapokera chawanangwa chapadera chomene. Mubali Mark Sanderson uyo ngwa mu Wupu Wakulongozga ndiyo wakafumiska Baibolo la Malemba Ghakupatulika mu Mang’anamuliro Gha Charu Chiphya Mateyu-Uvumbuzi mu Chikwangali na Chisepulana, kweniso Baibolo lakunozgekaso la Malemba Ghakupatulika mu Mang’anamuliro gha Charu Chiphya mu Chisetswana. Ŵapharazgi ŵakajoyina ku pulogiramu yapadera iyi kwizira pa videoconference, ndipo pulogiramu yikati yamara waka Mabaibolo agha ghakamba kusangika pa intaneti.

Timu ya ŵanthu ŵatatu yikamalizga kung’anamura Baibolo ili mu vyaka viŵiri. Ŵapharazgi ŵakujumpha 240 awo ŵakuyowoya chiyowoyero ichi, pasono ŵali na Baibolo ilo ndambura kusuzga kuŵerenga ndipo liŵawovwirenge chomene para ŵakusambira paŵekha kweniso para ŵali mu upharazgi.

Ŵanthu 6 awo ŵakagwira ntchito yakung’anamura Baibolo ili, ŵakatora pafupifupi chaka na hafu kuti ŵamalizge. Pali ŵapharazgi 374 awo ŵakuyowoya Chisepulana ku South Africa.

Yumoza uyo wakang’anamurako wakati: “Kanandi para tili mu upharazgi, tikatemwanga kugwiliskira ntchito Baibolo la Chisepedi. Ndipouli, pambere tindalongosore lemba, tikambanga dankha kung’anamulira mazgu gha mu vesi ilo, kuti uyo tikumupharazgira wapulikiske. Pasono na Baibolo ili, tisuzgikengeso na vyose ivi yayi, tiŵerengenge waka kamoza mbwenu waliyose waŵenge kuti wapulika kale.”

Ntchito yakunozgaso Baibolo ili yikatora pafupifupi vyaka vinayi kuti yimare. Ŵanthu 6 ndiwo ŵakang’anamurako Baibolo ili. Ŵapharazgi ŵakujumpha 5,600 ŵakuteŵetera mu chigaŵa icho ŵakuyowoya Chisetswana.

Pakuyowoya vya Baibolo la Mang’anamuliro gha Charu Chiphya mu Chisetswana, yumoza uyo wakang’anamurako wakati: “Baibolo ili liwovwirenge ŵapharazgi kuti ŵasazgireko maluso ghawo para ŵali mu upharazgi m’malo mwa kusuzgikaso na kulongosora mazgu ghanonono. Liwovwirengeso chomene pakusambira. Matchati, mapu, vithuzi, na mang’anamuro gha mazgu viwovwirenge ŵapharazgi kuti ŵaŵe na chithuzithuzi cha umo vinthu vikaŵira nadi apo nkhani izo zili mu Baibolo zikalembekanga.”

Mabaibolo agha ghawovwirenge ŵabali na ŵadumbu ŵithu kweniso awo ŵakuŵapharazgira kuti ŵamazge njara yawo yauzimu. Tikuwonga chomene chakurya chauzimu chinandi icho tili nacho mazuŵa ghano.—Yesaya 65:13.