Pa December 7, 2022, ofesi yakung’anamulirako mabuku mu chiyowoyero cha Chivenda yikamba kugwira ntchito mu Tawuni ya Makhado, South Africa. Ŵabali 10 awo ŵakung’anamura ku ofesi iyi mbateŵeti ŵanyengozose ndipo ŵanyake 8 ŵakugwira mazuŵa ghachoko waka.

Pali ŵanthu pafupifupi 1.2 miliyoni awo ŵakuyowoya Chivenda ku South Africa ndipo ŵanthu 100,000 ŵakuyowoya chiyowoyero ichi ku Zimbabwe. Pasono, mu vyaru viŵiri ivi muli mipingo 28 mu chiyowoyero cha Chivenda, ndipo muli ŵapharazgi pafupifupi 800.

Pa malo agha, pakaŵa kale nyumba iyo ŵali kuyinozga na kuyigaŵa vipinda vinayi. Ndipo pali kuzengeka ofesi yiphya yakung’anamulirako mabuku. Kweniso pafupi na ofesi iyi pali kugulika nyumba yinyake ya vipinda vitatu kuti ŵabali awo ŵakuchita milimo pa malo agha ŵaŵe na malo ghakukwana ghakugonamo.

Ofesi yakung’anamulirako mabuku iyi ŵali kuzenga mwakuyana na nyengo ya ku malo agha. Mwachiyelezgero, Mubali Jody Palvie, uyo wakulaŵilira mu Dipatimenti Yakuwona vya Mapulani na Kuzenga wakayowoya kuti: “Pakuti ku malo agha kukotcha chomene, makuni ghakurughakuru tili kughaleka kuti ghapelekenge tumphepo tuwemi, ndipo tili kugwiliskira ntchito matayilosi na viliŵa vyakuphaka polishi kuti mukati muzizimengeko.”

Pakuti ku malo uko kuli ofesi yiphya iyi ŵanthu ŵakuyowoya Chivenda, vikovwira ŵabali awo ŵakung’anamura mu chiyowoyero ichi kuti ŵayowoyeskanenge na ŵanthu mu chiyowoyero chawo. Munyake uyo wakuchitako mulimo wakung’anamura wakuyowoya kuti: “Sono tikuyowoyeskana na ŵanthu awo ŵakuyowoya chiyowoyero ichi zuŵa na zuŵa. Ivi vyawovwira kuti luso lwithu pakung’anamura lilute panthazi, ndipo vikutovwira kuti tilembenge mazgu agho ŵanthu ŵakuyowoya nadi nyengo zose.” Munyakeso uyo wakuchitako mulimo wakung’anamura wakuti: “Sono tili pafupi chomene na ŵabali na ŵadumbu awo ŵakuyowoya Chivenda awo ŵangatovwira para tikujambura mavidiyo na mabuku ghakuchita kutegherezga.”

Tikumanya kuti Yehova walutilirenge kutumbika ivyo ŵabali na ŵadumbu aŵa ŵakuchita apo ŵakuyezgayezga ‘kupharazga malumbo gha Yehova’ ku ŵanthu awo ŵakuyowoya Chivenda.—Salimo 145:21.