Ŵenecho ŵa malo ghakuchitira maungano ku South Korea ŵalumba gulu lithu chifukwa cha kuŵika pulogiramu yose ya ungano wa chigaŵa wa 2020 pa intaneti m’malo mwakuti ŵanthu ŵalute ku masitediyamu. Ŵalaraŵalara aŵa ŵakatilumba chifukwa chakuti tikuzirwiska chomene umoyo wa ŵanthu kweniso tikulutilira kuchita vinthu vyauzimu. Ndalama zose izo tikalipira ku ŵenecho ŵa malo agha ŵatiwezgera.

Uyo wakulaŵilira ghamoza mwa malo agha ku Seoul wakati: “Tikamanya kuti Ŵakaboni ŵa Yehova ŵachitenge vinthu mwamahara. Tikuŵatemwa chomene. Nakuti nkhukayika usange pali chisopa chinyake mu chigaŵa chithu icho chikuchita vinthu vyakovwira nthena.” Wakatiso: “Ŵakaboni ŵa Yehova ŵakudangizga vyakukhumba vya ŵanyawo. Chitima chatikora waka kuti chaka chino ŵachitirenge mu malo ghithu yayi ungano wawo. Kweni tili na chigomezgo chose kuti ŵazamughagwiliskiraso ntchito munthazi pa vyakuchitika vinyake.”

Ku Suwon, uyo wakulaŵilira malo agha wakati: “Nkhuwonga chomene kuti kwa vyaka 35 ivyo vyajumpha Ŵakaboni ŵa Yehova ŵakugwiliskira ntchito malo agha ndipo ŵakughapwelelera nga kuti ngawo waka. Pasono nkhuŵawongaso kuti ŵachitapo kanthu kuti ŵalondezge malango agho boma lili kuŵika pa nkhani ya kuchepeska muliri wa COVID-19. Nkhukondwa chomene na umo ŵakuchitira vinthu. Nkhukhazga waka kuzakawonaso Ŵakaboni ŵa Yehova ŵakuchita ungano mu malo agha chaka chikwiza.”

Munthu munyake uyo wakugwira pa chiŵanja cha ndege kufupi na malo gha ungano agha wakati: “Mu 2018 na 2019, tikawona umo [Ŵakaboni ŵa Yehova] ŵakuchitira vinthu mwandondomeko kweniso umo ŵakulondezgera luŵiro ivyo ŵaphalirika. Ivyo ŵasankha kuchita pa nkhani ya ungano wa chaka chino vikulongora kuti ŵakughanaghanira chomene ŵanji, ndipo ivi vyanikhwaska chomene.” Wakatiso: “Tikuwona kuti ŵanthu wose ŵaŵenge nga Mbakaboni, nthe vinthu vili makora chomene.”

Taŵanthu ŵa Yehova ndise ŵakukondwa chomene chifukwa tili kusambizgika makora umo tingalongolera chitemwa ku ŵazengezgani ŵithu ndipo chitemwa ichi chikuwoneka makora mu nyengo zakusuzga izi.—Mateyu 22:39.