Pa April 23, 2023, Buku la mu Baibolo la Mateyu, likafumiskika mu chiyowoyero cha mawoko cha Chitchayinizi pa ungano uwo ukachitikira ku South Korea. Aka nkhakwamba kuti buku la mu Baibolo lifumiskike mu chiyowoyero cha mawoko cha Chitchayinizi. Ŵanthu pafupifupi 200 ŵakawungana kufuma mu mipingo yiŵiri ya chiyowoyero cha mawoko cha Chitchayinizi ku South Korea. Buku ili sono likusangika pa intaneti kuti ŵanthu ŵachite dawunilodi pa jw.org na pa JW Library Sign Language app.

Awo ŵakang’anamura buku ili ŵakayezga kung’anamura mwakupulikikwa makora kweniso munthowa yipusu. Munyake uyo wakang’anamurako wakayowoya kuti: “Ŵanthu ŵaŵiri pa ŵatatu awo ŵakang’anamuranga Baibolo ili ŵakaŵa ŵakumangwa, ntheura kanandi tikadumbiskananga umo ŵanthu aŵa ŵakughanaghanira. Ntheura chikaŵa chipusu kung’anamura mwakupulikikwa makora chifukwa tikamanyanga umo ŵakumangwa ŵakughanaghanira na kuchitira vinthu.”

Munyakeso uyo wakang’anamurako wakati: “Mulimo wakung’anamura Baibolo ili wanovwira chomene kuti nipulikiske makora ivyo Yesu wakachita, ivyo wakajumphamo, kweniso ivyo wakasambizganga apo wakaŵa pa charu chapasi.”

Mupharazgi wakumangwa uyo nayo wakaŵapo pa ungano uwu wakati: “Pambere buku ili lindafume, pakaŵa mavesi ghachoko waka gha chiyowoyero cha mawoko cha Chitchayinizi. Vikaŵa nga tikuwona kachigaŵa kachoko waka kachithuzi. Sono pakuti buku la Mateyu lafumiskika, nili wakukondwa chomene kuti pasono nkhuwona chithuzi chose cha buku ili.”

Mupharazgi munyake wakumangwa wakayowoya kuti: “Mabuku gha mu chiyowoyero cha mawoko agho gulu la Yehova likupeleka, ndiposo kufumiskika kwa buku la Mateyu mu chiyowoyero cha mawoko cha Chitchayinizi, vyanovwira chomene kumanya kuti Yehova wakukhumba kovwira ŵanthu ŵakumangwa, kweniso wakuŵatemwa chomene.”

Tikuwonga chomene Yehova chifukwa cha buku la mu Baibolo ili, ilo liwovwirenge ŵabali na ŵadumbu ŵithu kulutilira kusopa Chiuta mu “mzimu na mu unenesko.”—Yohane 4:24.