Pa January 28, 2021, Khoti Likuru la ku South Korea likagamura kuti ni mulandu yayi para munthu wakana kunjira usilikari wakukolerapo waka chifukwa cha njuŵi yake. Pasono, ŵabali ŵithu awo ŵakaŵa ŵasilikari pambere ŵandaŵe Ŵakaboni ŵa Yehova ŵalangikengeso yayi chifukwa cha kukana kukachita masambiro gha usilikari.

Ŵanalume wose ŵa ku South Korea awo ŵakagwirapo ntchito ya usilikari ŵakwenera kuluta kukasambira masambiro gha usilikari wakukolerapo waka mwa apo na apo kwa vyaka 8. Ivi vikapangiskanga kuti ŵabali ŵithu awo pakwamba ŵakaŵa ŵasilikari nawo ŵachemekenge kuluta ku masambiro agha ndipo ŵakalangikanga kanandi waka chifukwa cha kukana kulutako. Mubali munyake wakawonekera ku ŵapolisi, ofesi ya wakwimira boma pa milandu, na ku makhoti kwa maulendo pafupifupi 60 mu chaka chimoza pera.

Mu 2018, makhoti ghakuru ghaŵiri gha ku Korea, Khoti la Vyamalango na Khoti Likuru, ghakadumura kuti para munthu wakana kunjira usilikari chifukwa cha njuŵi yake ni mulandu yayi ndipo ghakajura mwaŵi wa ntchito zinyake zambura kukhwaskana na vya usilikari. Kweni Makhoti agha ghakayowoyapo chilichose yayi pa nkhani ya Dango la Usilikari Wakukolerapo waka ilo likuzomerezga boma kulanga ŵanthu awo ŵakana kuluta ku masambiro gha usilikari chifukwa cha ivyo ŵakugomezga.

Chigamuro icho Khoti Likuru lapeleka mwasonosono chikulongora kuti ni dango kuleka kuŵapa mulandu awo ŵakana kuluta kukasambira vya usilikari wakukolerapo waka chifukwa cha njuŵi yawo. Ŵabali awo ŵasuzgika kwa nyengo yitali kuluta kukategherezga mulandu wawo ku khoti chifukwa cha kukana masambiro agha, pasono ŵangapempha kupika ntchito zinyake ndipo ŵalipiskikenge yayi panji kujalirikaso mu jele chifukwa cha kukana usilikari. Mubali Nam Tae-hee, uyo njumoza mwa ŵabali awo ŵakapika mulandu wakuyana waka, wakulongosora kuti: “Pa vyaka 8 ivyo vyajumpha nawonekera ku khoti maulendo ghanandi chomene, pasono ningati wanangwa wane wambaso kuchindikika. Nkhujipulika nga kuti nathura katundu muzito chomene.”

Ndise ŵakukondwa ndipo tikuwonga Yehova lumoza na ŵabali ŵithu ŵa ku Korea pamoza na mbumba zawo, awo ‘ŵazizipizga vyakuŵinya na kusuzgika kwambura chifukwa kuti ŵaŵe na njuŵi yiwemi kwa Chiuta’!—1 Petrosi 2:19.