Pa June 28, 2018, mu mbiri yose ya charu cha South Korea, nkhakwamba kuti khoti lidumure kuti pasangike ntchito zinyake izo awo ŵakana kugwira ntchito zausilikari chifukwa cha njuŵi yawo ŵakwenera kupika. Ivyo khoti ili ladumura vyapangiska kuti dango lakuchichizga ŵanthu kugwira ntchito zausilikari ilo lakhala vyaka 65, ŵaliwoneso makora.

Kwambira mu 1953, ŵabali ŵakujumpha 19,300 ŵakakakika, ndipo para tingasazga vyaka ivyo waliyose wa ŵabali aŵa wakeruzgika kuti wakhale mu jele, vikujumpha 36,700. Ivyo khoti ili ladumura viwovwirenge Khoti Likuru Chomene ku Korea para likudumura milandu ya awo ŵakukana kugwira ntchito zausilikari chifukwa cha njuŵi zawo. Kweniso vipangiskenge mphara ya malango ku Korea kusanga ntchito zinyake izo ŵangapeleka kwa awo ŵakana kugwira ntchito zausilikari. Mphara iyi yikwenera kuchita ivi pambere deti la December 31, 2019 lindajumphe.

Tikukondwa pamoza na ŵabali ŵithu ku Korea kuti sono nthowa yasangika yakumazgira vinthu vyambura urunji ivyo vyachitika kwa vyaka vinandi.—Zintharika 15:30.