Mu nyengo ya muliri iyi, ŵabali na ŵadumbu ŵakuŵikapo mtima kupembuzga ŵazengezgani ŵawo mwakuŵalembera makalata yakuŵakhozga. Mubali Josué Laporta na muwoli wake, Vanesa, ŵakalembera makalata ghakukhozga ŵanthu awo ŵakugwira ntchito pa chipatala na kwa awo ŵakulwara nthenda ya COVID-19 pa chipatala chinyake ku Barcelona, Spain. Nesi munyake wakaŵazgora kalata iyo ŵakalemba. Pasi apa pali kalata iyo wakalemba ndipo mwenecho wakatipa wenelero wakuti tingalongoraso ŵanthu ŵanyake nangauli vinyake tili kuwuskamo. *

Ndine nesi . . . Kalata iyi nkhulembera [zina lawuskikapo], uyo ni gogo wa vyaka 97. Tangumuŵerengera kalata yinu mulenji uno. Para kwiza makalata ghakupelekeka waka kwa mulwari waliyose ndipo nkhugomezga kuti yinu yapuluka yayi. Kalata iyo mwalemba yawovwira ŵanthu ŵaŵiri, [mulwari] na ine . . . , kuti tiŵe na chigomezgo. [Gogo uyu] ni mulwari chomene, ndipo wanguniphalira kuti wakukhumba kumufumbani fumbo pambere wandalekane nacho charu ichi. Fumbo lake ndakuti: “Nanga ni apo nili na vyaka 97, kasi vingazakachitika kuti nizakawone malayizgo agho ghali mu Baibolo ghakufiskika?”

Kumulenji uku kwa maminiti 10, nangumuŵerengera nkhani yinyake iyo yili pa webusayiti iyo mukatuma. Nkhani iyo nangumuŵerengera yangumufika pa mtima chomene chisko chake changwamba kuwoneka kuti ngwakukondwa. Nakuti ine nindamuwonepo kuti wakuwoneka nthena. Kufuma apo tanguwonelera vidiyo yakuti “Chifukwa Wuli Yesu Wakafwa?”

Nanguŵazgaso nkhani ya mu magazini gha [“Wukani!”] iyo yikuyowoya ivyo tingachita para tikusuzgika maghanoghano. Nkhani iyi yanovwira kuzizipizga suzgo iyo tilimo sono. Nga umo mukumanyira kuti vinthu vili makora yayi.

Pa chipatala chithu chino palije munthu uyo wakovwira ŵanthu awo ŵakusuzgika maghanoghano, kweni uthenga uwo mwatipa ngwakovwira chomene ndipo kanandi tikuwughanaghanira. Para muliri wamara, nizamukhumba kuti munovwire kumanya vinandi ndipo nili na chigomezgo chose kuti muzamuŵa ŵakunozgeka kuzakanisambizga ivyo nkhukhumba kumanya, muzakanisimikizgire kuti vingachitika nadi kuti vinthu vizakasinthe pa charu. Nkhusoŵa na chakuyowoya kwa Chiuta chifukwa cha kalata yinu yafika nkhanira panyengo yake iyo ine nkhwambira kugwira ntchito, nati nayipokera waka nkhaluta nayo mu chipinda cha [ŵalwari].

Nkhugomezga kuti muli makora pamoza na mbumba yinu, ndipo nkhugomezga kuti ivyo mukugomezga vikumovwirani kuzizipizga masuzgo agho ghalipo sono kuluska taŵanandi ŵa ise. Nkhumuwongani chifukwa cha mtima winu wakughanaghanira wose nga [mbalwari] na ine. Nangauli mukutimanya yayi kweni mukatovwira chomene kuŵa ŵakukondwa kwa masabata 6 agho ghajumpha.

Nkhumuwongani kufuma pasi pa mtima.

Nkhani zakukhozga nga ni izi, zikutikhukiska kuti tilutilire kupharazga nangauli kuli muliri. Tikulomba kuti mphanyi mazgu agho tikuyowoya para tikupharazga ghaŵa ghakupembuzga ku ŵanji.—Zintharika 15:23.