Pa April 2, 2022, Mubali Alberto Rovira, uyo ngwa mu Komiti ya Munthavi ya Spain, wakafumiska Baibolo la Malemba Ghakupatulika mu Mang’anamuliro gha Charu Chiphya mu Chicatalan ilo pasono nda pa intaneti pera. Ŵakaboni awo ŵakuyowoya Chicatalan ku Andorra na vigaŵa vinyake vya Spain, kusazgapo vilwa vya Balearic, Catalonia, na Valencia, ŵakawonelera pulogiramu iyi kwizira pa intaneti ndipo ŵanthu ŵakujumpha 3,000 ŵakajoyina pa JW Stream. Mabaibolo ghakuchita kupulinta ghambenge kusangika mu myezi yikwiza iyi ku mipingo.

Mabaibolo gha mu Chicatalan ghakamba kusangika vyaka 800 kumasinda uku. Baibolo linyake la mu Chicatalan ilo ndakupambanako na ghanyake likuchemeka Rhymed Bible, ndipo likafumiskika pakati pa 1282 na 1325. Lili na mazgu gha mabuku 18 gha mu Baibolo agho ghakupulikikwa mwakuyana kuumaliro, ivyo vikovwira kuti ŵanthu ŵaleke kuluwa mazgu ghake.

Mabaibolo ghanandi gha mu chiyowoyero ichi ghali na mazgu ghakale, ndipo chikuŵa chakusuzga kuti ŵanthu ŵapulikiske ivyo ŵakuŵazga. Apo ghanyake ghalije zina la Yehova panji ghali na fundo zinyake zakubudika.

Nga umo wakayowoyera Mubali Rovira mu pulogiramu ya kufumiska Baibolo ili: “Tili na chigomezgo chose kuti Baibolo ili lili nadi na maghanoghano gha Chiuta agho ghalembeka makora mu chiyowoyero chithu chakonkhera.”

Ndise ŵakukondwa kuti awo ŵakuyowoya Chicatalan ŵasangenge chandulo chomene na nkhongono ya Mazgu gha Chiuta.—Ŵahebere 4:12.