Ofesi ya munthavi ya Spain mwasonosono apa yamalizga kunozga yimoza mwa nyumba iyo muli maofesi. Nyumba iyi chomene yizamovwiranga awo ŵakuchita mulimo wakung’anamura. Ntchito yakunozgaso nyumba iyi ntchigaŵa cha mulimo ukuru wakunozga ofesi ya munthavi uwo ukwenera kuzakamara mu chaka cha 2025.

Nyumba iyi pasono muli Layibulare iyo munganjira mabuku 4,000 gha maliferensi gha mulimo wakung’anamura. Muliso mabuku agho ghakusangika yayi pa intaneti.

Mubali John Bursnall, uyo ngwa mu Komiti ya Munthavi ya Spain wakuti: “Mulimo pa ofesi ya munthavi ya Spain wasintha chomene mu vyaka 25 ivyo vyajumpha. Padera pa kupurinta mabuku na kusunga katundu, ofesi yithu ya munthavi pasono yikung’anamura vinthu vya mu Chisipanishi na mu Chiyowoyero cha Mawoko cha ku Spain, kweniso vilembo vya braille mu viyowoyero vinandi vya ku Europe. Ivi ndivyo vikapangiska kuti maofesi ghasanuzgike. Tikukayika yayi kuti ntchito yakunozga maofesi iyi yitovwirenge kuti tikhozgere makora mulimo wa pa charu chose.”

Mulimo wakunozgaso maofesi wamba kale pa nyumba zinayi zakukhalamo ŵanthu. Ŵanthu ŵakujipeleka 200 ndiwo ŵachitengeko mulimo uwu. Ŵabali na ŵadumbu awo ŵazamovwirapo, ŵaŵapangira nyumba 70 zakukolerapo waka.

Mulimo wakupharazga ukulutilira kukura ku Spain. Pasono kuli ŵapharazgi 120,530. Ŵapharazgi 23,565 ndiwo ŵakuchitako upayiniya wanyengozose. Chiŵelengero cha awo ŵakuchita upayiniya chakwera na maulendo 8 mu chaka chamara cha uteŵeti.

Tikumanya kuti Yehova wawovwirengepo pa mulimo uwo pasono nthena uli mukati, mwakuti nyumba izo zikunozgeka zifiske chilato chake cha kupeleka malumbo ku zina lake lituŵa.—Salimo 61:8.