Pa December 15, 2023, nkhondo iyo yikuchitika pakati pa magulu ghaŵiri ku Khartoum, uwo ni msumba ukuru wa Sudan, yikathandazgikira mu msumba wa Wad Madani uwo ni msumba wachiŵiri ukuru mu charu ichi. Nga umo tikayowoyera kale pa jw.org, apo nkhondo yikambikanga mu msumba wa Khartoum mu April 2023, ŵabali na ŵadumbu ŵanandi ŵakachimbilira ku Wad Madani, uwo ni mtunda wa makilomita pafupifupi 170 kumwera chakumafumiro gha dazi kwa msumba ukuru. Pasono, ŵabali na ŵadumbu aŵa ŵakujumpha 150 ŵachichizgikaso kuchimbira chifukwa cha nkhondo iyi.

• Palije mubali panji mudumbu uyo wali kupwetekeka panji kufwa

• Ŵabali na ŵadumbu pafupifupi 158 ŵali kusamuka mu nyumba zawo. Ŵanji ŵali kusamukira mu msumba wapafupi panji mu vyaru vinyake

• Ŵabali na ŵadumbu 10 na ŵachibali ŵawo awo Mbakaboni yayi ŵachali mu msumba wa Wad Madani

• Ŵalaŵiliri ŵadera na ŵalara ŵakupeleka wovwiri wauzimu kwa awo ŵakhwaskika

• Makomiti Ghakovwira Para Kwachitika Masoka ku Sudan na ya mu vyaru vinyake vyapafupi ghakulutilira kudangilira kupeleka wovwiri nga chakurya, mankhwala, kweniso malo ghakukhala

Kweni chakuzirwa chomene ntchakuti kwati kwakhala pachoko waka pambere vivulupi vindambe ku Wad Madani, ofesi ya munthavi ku East Africa yikanozga kuti awo ŵaleka vikaya vyawo chifukwa cha nkhondo ŵawonelere ungano wa chigaŵa mu Chiarabic wa 2023 wakuchita kujambura wa mutu wakuti ‘Lutilirani Kuzikira’! Mwa ŵanthu 200 awo ŵakategherezga ungano uwu, 145 ŵakaŵa ŵabali na ŵadumbu awo ŵakachimbira nkhondo ku Khartoum. Ŵanandi pa ungano uwu ŵakawonga chakurya chauzimu chapanyengo yake icho ŵakapokera. Ŵakakhozgeka chomene na seŵero la mutu wakuti “Nthowa Yako Uyipeleke kwa Yehova,” ilo likalongosoranga vyakuchitika vyakuyanako na ivyo vikuŵachitikira. Kweniso ŵanthu 7 ŵakabatizika pa ungano uwu.

Tikulomba kuti ŵabali na ŵadumbu ŵithu ku Sudan ŵalutilire kuzizipizga masuzgo agha, ndipo tikulindilira mwakunweka nyengo iyo Yehova ‘wazamulekeska nkhondo pa charu chose chapasi.’—Salimo 46:9.