Nga umo tikayowoyera pakwamba, pa September 21, 2021, Mubali Rustamjon Norov, uyo wali na vyaka 22, wakafumiskika mwaluŵiro mu jele pambere nyengo yake yindakwane ku Tajikistan, chifukwa cha dango lasono ilo likamba kugwira ntchito kukwambilira kwa mwezi wenewuwu. Wakakhala myezi yitatu mu jele ilo ŵakamusunganga kulindilira kuti weruzgike. Pa May 10, 2021, wakasamuskikira ku jele la ku Yavan kuti wakalutizge kugwira vyaka vitatu na hafu ivyo wakapika. Kwambira waka apo wakasungikanga mu jele, apo wakeruzgikanga, na apo wakagwiranga jele, wose awo ŵakamuwonanga Rustamjon ŵakamutemwanga chifukwa cha nkharo yake yiwemi na kugomezgeka.

Ulendo unyake apo khoti likategherezganga mulandu wake, mulara munyake wa ŵasilikari wakiza kwa Rustamjon na kukorako chasa. Mulara wa ŵasilikari uyu wakalongosora umo wakakhwaskikira na chikanga kweniso kuleka kusunkhunyika uko Rustamjon wakalongora. Kufuma apo wakatiso: “Waliyose uyo wakugomezga mwa Chiuta wakwenera kuchita nga ndiwe.” Wakatiso: “Nkhugomezga kuti uzamukondwa chomene vyaka ivyo vikwiza kunthazi uku, para pazakaŵa ntchito zinyake padera pa usilikari muno mu Tajikistan, ndipo zina lako lizamuŵa mu gulu la awo ŵakajipata kuti ŵanthu ŵaŵe na wanangwa uwu.”

Apo Rustamjon wakaŵa mu jele, wakalutilira kulongora nkharo yiwemi. Chifukwa cha nkharo yake yiwemi, wakachemeka na ŵalaraŵalara ŵa jele kuti nayo wakasambireko masambiro agho wupu wa European Union ukachitiska. Chilato cha masambiro agha chikaŵa kovwira ŵakayidi kuti ŵakasange ntchito para ŵafuma mu jele. Wati wamalizga masambiro agha, ŵalara ŵa jele ŵakamupa Rustamjon satifiketi na kalata yakumuwonga chifukwa cha kulimbikira kwake. Rustamjon wakuti ŵamazaza aŵa ŵakati wali na nkharo yiwemi chifukwa cha kulondezga fundo za mu Baibolo.

Pambere wandafumiskike mu jele, Rustamjon wakakayikanga usange nayo wangafuma luŵiro chifukwa cha dango lasono ilo likaŵikika. Kweni ŵakayidi ŵanyake ŵakamusimikizgira kuti wafumenge chifukwa cha lumbiri luwemi ulo wakamanyikwanga nalo mu jele. Ŵalara ŵanyake ŵa jele nawo ŵakamukhozganga chomene.

Ŵakaboni ŵachinyamata ŵakugomezgeka, nga ni Rustamjon, awo ŵakujalirika mu jele chifukwa cha kuleka kunjilirapo pa vya charu na kulutilira kugomezgeka kwa Yehova, ŵakuzomerezga kuti “ungweru [wawo] uŵale panthazi pa ŵanthu.” Kweni chikuru chomene ntchakuti, ‘milimo yawo yiwemi’ yikupeleka uchindami na ntchindi kwa Yehova Chiuta.—Mateyu 5:16.