Pa May 16, 2023, Mubali Shamil Khakimov wali kufumiskika mu jele ku Tajikistan. Wakawelera pa nyumba yake wati wakhala vyaka vyakujumpha vinayi mu jele chifukwa cha chipulikano chake.

Pambere wandakakike mu 2019, Shamil wakaŵa kale na suzgo la BP, nthenda ya mtima, na matenda ghanyake. Nangauli wakaŵa wakunyotwa, Shamil wakapokera yayi wovwiri wakwenelera wa chipatala apo wakaŵa ku jele. Pa chifukwa ichi, suzgo lake la ulwari likafika paheni chomene, ntheura vikapangiska kuti wakoreke na nthenda ya vilonda mu malundi na kusi ku malundi ghake.

Nangauli Shamil wakasangana na masuzgo ghanandi mu jele kweniso vyakuŵinya muthupi, kweni wakalutilira kuwona vinthu mwakwenelera, chifukwa nyengo zose wakughanaghanirapo mavesi gha mu Baibolo.

Mu malurombo ghake, kanandi wakuzunuramo mazgu gha pa Salimo 141:8, apo pakuti: “Maso ghane ghali kwa imwe, A Yehova Fumu Yikuru. Mwa imwe ndimo nkhubisama.” Kweniso wakakhozgeka chomene na lemba la Yesaya 49:13, 16, apo mwakuyelezgera pakuyowoya kuti mazina gha ŵanthu ŵake ŵakusuzgika ghali ‘kujobeka’ pa chikufi cha Yehova. Mazgu agha ghakamukhozga chomene Shamil kumanya kuti nangauli wakajalirika mu jele, kweni Yehova wakamuluwa yayi.

Pakuti wakakhozgeka na mazgu gha Yehova, Shamil wakalutilira kuŵa wachimwemwe ndipo wakakhozgangaso ŵanji. Mubali uyo kanandi wakatemwanga kuyowoyeskana na Shamil apo wakaŵa ku jele wakayowoya kuti: “Nyengo yakwamba apo nkhamuyimbira, nkhakhazganga kuti mazgu ghake ghapulikikwenge ghachitima chomene. Kweni ndimo vikaŵira yayi, wakaŵa na chipulikano chakukhora. Wakalutilira kuwona vinthu mwakwenelera ndipo kanandi wakatikhozganga ndiyo.”

Lemba la Chitengero cha Yeremiya 3:25 likuti: “Yehova ni muwemi kwa uyo wakumugomezga, kwa munthu uyo wakulutilira kumupenja.” Tikulomba na chigomezgo chose kuti Yehova walutilirenge kuŵa “muwemi” kwa Shamil kweniso ku ŵabali na ŵadumbu ŵithu wose awo ŵakuzizipizga masuzgo mwachimwemwe ku Tajikistan.