Sonosono apa * khoti la ŵasilikari ku Tajikistan lipelekenge chigamuro pa mulandu wa Mubali Rustamjon Norov. Khoti lingadumura kuti mubali withu wakagwire jele vyaka viŵiri m’paka 5 chifukwa cha kukana kunjira usilikari chifukwa cha njuŵi yake. Iyo ŵakumusunga mu selo kwambira waka pa October 1, 2020.

Rustamjon Norov

• Chaka cha kubabikira: 1998 (Dushanbe)

• Mbiri yake: Wakagwiranga ntchito ya kunozga nyumba na kutoweska vinthu kuti wasange ndalama yakovwilira mbumba yakwake. Wakutemwa kuseŵera bola

• Wakabatizika mu 2016 apo wakaŵa na vyaka 17. Pakati pajumpha vyaka viŵiri, wakasama mu mpingo wa Chirussia uwo mbumba yakwake yikawungananga, na kuluta kukawovwira ŵanthu awo ŵakuyowoya Chitajiki kuti nawo ŵasambire Baibolo

Mu 2016, Mubali Rustamjon Norov wakaluta ku ofesi ya ŵasilikari. Wakaŵalongosolera mwakupulikikwa makora kuti iyo wakunjilirapo yayi pa vya charu ndipo wakapempha kuti wagwire ntchito zinyake. Chaka chakulondezgapo wakachitaso mwakuyana waka. Yumoza wa ŵalara ŵa ŵasilikari wakamupulikiska Mubali Norov ndipo wakakhorwa na ivyo mubali uyu wakalongosora. Mu vyaka vitatu vyakulondezgana, Mubali Norov wakachemeka yayi kuti wakanjire usilikari.

Kweni pa September 24, 2020, ofesi ya ŵasilikari yikamuchema Mubali Norov. Ŵalaraŵalara ŵa ŵasilikari ŵakamufumba mafumbo kwa maora ghatatu ndipo paumaliro ŵakati wali makora waka mwakuti wangafiska ntchito ya usilikari. Ŵalara aŵa ŵakamuchichizga kuti walute kukawonana na dokotala kuti ŵakamupime. Adada ŵa Mubali Norov nawo ŵakaŵapo ndipo ŵakapempha ŵalara ŵa ŵasilikari aŵa kuti nkhani iyi yilute ku ofesi ya uyo wakwimira boma pa milandu.

Pa October 1, Mubali Norov na adada ŵake ŵakaluta ku ofesi ya wakwimira boma pa milandu. Wakwimira boma pa milandu wakaŵapa mpolisi kuti wakaŵapelekezge ku ofesi ya ŵasilikari. Ŵati ŵafika uku, adada ŵa Mubali Norov ŵakaŵazomerezga yayi kunjira. Mubali Norov ŵakamujalira mu selo kwa mazuŵa ghaŵiri. Mubali uyu ŵachali ŵandamupe mulandu uliwose. Apo wakaŵa mu selo, ŵalara ŵa ŵasilikari ŵakamukaniranga kuyowoyeskana na loya wake.

Pa October 3, Mubali Norov ŵakamusamuskira ku ofesi yinyake ya ŵasilikari mu msumba wa Khujand, iyo yili pa mtunda wa makilomita 300 (186 mi) kufuma ku Dushanbe uko kukukhala mbumba yakwake. Mu mazuŵa ghaŵiri ghakulondezgapo ŵakamusamuskiraso ku maofesi gha ŵasilikari ghakupambanapambana mu Khujand.

Pa October 6, Mubali Norov wakazomerezgeka kuwonana na ŵapapi ŵake kweniso kuyowoyeskana na loya wake. Ndipouli, pa October 17, khoti la ŵasilikari ku Tajikistan likadumura kuti mubali uyu ŵakamusunge dankha mu jele. Ŵalutilirenge kumusunga mu jele apo ŵakufufuza dankha ukaboni kweniso m’paka apo khoti lizamuwona kuti lingachita nayo wuli. Mubali Norov ŵakumupa mulandu wakuti wakasintha vipepara vya ku chipatala vyakuyowoya kuti wali na suzgo mwakuti wagwenthe kunjira usilikari.

Nangauli Mubali Norov wali mu jele, kweni wakuthera yayi ndipo wakulutilira kugomezga chomene Yehova. Iyo wakuwonga chomene Yehova chifukwa cha kumovwira kuŵa na chipulikano chakukhora kweniso chikanga ivyo vikumovwira kuti walutilire kuzizipizga chiyezgo ichi. Mubali Norov wakuluwaso yayi chiyezgo chinyake icho chikachitika mwamabuchi mu 2013. Mu chaka ichi, ŵamazaza ŵakiza ku sukulu kwawo na kukora iyo na munung’una wake, Ravshan, na kuluta nawo ku ofesi ya ŵasilikari kuti ŵakaŵapime usange ŵali makora mu thupi. Rustamjon wakaŵa na vyaka 15 pera pa nyengo iyi—wakaŵa wandakwaniske vyaka ivyo munthu wakwenera kunjira usilikari—ndipo wakaŵa mupharazgi wambura kubatizika. Ivi vikati vyachitika pa nyengo ya kusopa kwa mbumba, adada ŵa ŵana aŵa, a Batyr, ŵakamaliranga nyengo yinandi kusambizga ŵana ŵawo umo ŵangachitira kuti ŵaleke kunjilirapo pa vya charu. Kanandi waka a Batyr ŵakayezgeleranga kuti iwo mbalara ŵa ŵasilikari ndipo ŵana ŵawo ŵakayezgeleranga umo ŵangalekera kuthera para ŵakuchichizgika.

Rustamjon wakuti: “Apo tikaŵa tindambe kuyezgelera pa nyengo ya kusopa kwa mbumba umo tingachitira kuti tileke kuthera, nkhawonanga nga kuti ndine wakunozgeka kale kuvikilira chipulikano chane. Kweni tikati tamba kuyezgelera, nkhazizwa chomene kuwona kuti wofi ukanikoranga ndipo nkhanjenjemeranga. Ivi vikanovwira kumanya kuti nkhwenera kulomba na kusambira vinandi vya umo ningachitira kuti nileke kuthera ku chiyezgo. Nkhani nachita nthena, pachokopachoko wofi ukamba kumara.Cha kukwambilira kwa 2016, nkhajipeleka kwa Yehova na kubatizika.”

Rustamjon wakukhozgekaso chomene para wakuchezga na ŵabali ŵachekuru awo mbakukhwima mwauzimu ndipo nawo ŵakajalirikapo mu jele chifukwa cha chipulikano chawo. Iyo wakuti: “Nkhumanya makora kuti para naleka kunjilirapo pa vya charu, nisanganenge na masuzgo. Para ningajalirika mu jele, nkhuwona kuti ni mwaŵi wakuti novwirepo kutuŵiska zina la Yehova ku ‘chigaŵa chiphya.’”

Adada ŵa Rustamjon ŵakuti: “Mbumba yithu yikuwonga chomene Yehova chifukwa cha kutipa mwaŵi wakumuteŵetera. Ku ŵabali na ŵadumbu wose tikuti, ‘yewo chomene chifukwa cha chitemwa icho mukulongora, malurombo ghinu na wovwiri uliwose uwo mukutipa kuti tilutilire kuŵa paubwezi na Yehova.’ Tikufipa mtima panji kwenjerwa yayi. Mtende wa Chiuta ukuvikilira mitima yithu, nga umo Yehova wakutilayizgira mu Mazgu ghake!”—Ŵafilipi 4:6, 7.