Ŵati ŵamufumiska mu jele pa November 1, 2020, Mubali Jovidon Bobojonov wakati: “Yehova wakanovwira kuti nilutilire kuŵa na chipulikano chakukhora.” Pa 31 October, Pulezidenti wa charu cha Tajikistan wakagowokera Mubali Jovidon pamoza na ŵakayidi ŵanyake 377. Mubali withu wakaŵa kuti wakhala mu jele myezi 9 pa vyaka viŵiri ivyo wakapika kuti wagwire jele chifukwa cha kukana kunjira usilikari chifukwa cha njuŵi yake.

Pa October 4, 2019, ŵasilikari ŵakiza ku nyumba kwa Mubali Jovidon na kumukora, ndipo ŵakaluta nayo ku ofesi yakulembera ŵanthu usilikari. Panyengo iyi wakaŵa na vyaka 19. Kwa myezi yinandi, ŵakalutanga nayo ku malo gha ŵasilikari ghakupambanapambana. Kulikose uko ŵakalutanga nayo na kumujalira, wakeneranga kulongosora chifukwa icho wakukanira usilikari. Jovidon wakuti: “Ŵalaraŵalara ŵa ŵasilikari pamoza na ŵasilikari ŵanyake, ŵakanifumbanga mafumbo kuti ŵanisange chifukwa, ndipo ŵakakhumbanga kuti nileke chisopa chane. Ŵakayezga umu na umu kunifumba mafumbo ghakuti m’paka nikwiye. Nyengo zinyake ŵakaniwuskanga pakati pa usiku na kunifumba mafumbo gheneghara, kweniso kuti nilongosore chifukwa icho nkhukanira usilikari.

“Kweni lurombo ndilo lukanovwira chomene. Apo nkhaŵa ku malo gha ŵasilikari agha, nkhalombanga muhanya na usiku uku nkhuthiska masozi, kumuŵeyelera Yehova kuti wanovwire kuti nileke kuthera, kuti nileke kumukhuŵazga kweniso kuti nileke kuzgora mwaganyavu para ŵanikwiyiska.

“Yehova wakanikora pa woko . . . Para nili na phukwa, ndipo nkhenjerwanga chomene. Kweni Yehova wakanikhozganga chomene kwizira mu ivyo wali kulenga. Mulenji uliwose nkhawukanga para napulika tuyuni tukwimba. Usiku nkhadaŵiranga mwezi na nyenyezi. Vyawanangwa vyakufuma kwa Yehova ivi vikanikhozganga na kunovwira kuti niŵe wakukondwa.”

Pa April 2, 2020, khoti likadumura kuti Jovidon wali na mulandu, ndipo ŵakamusamuska ku malo gha ŵasilikari na kuluta nayo ku jele. Wakazomerezgekanga yayi kupokera makalata. Ndipouli, ŵabali na ŵadumbu ŵakalutanga kukamupa chakurya, ndipo ŵakalembanga lemba la zuŵa pa vikwama ivyo ŵayeghamo vyakurya. Jovidon wakuti, “Ivi vikanovwira kuti nileke kuchita phukwa kweniso kumanya kuti ŵakunitemwa chomene.”

Jovidon wakakondwaso chomene chifukwa chakuti wakakumbukanga mavesi gha mu Baibolo agho ghali na fundo zakukhozga, nga ni Ŵaroma 8:37-39. Iyo wakuti: “Apo nkhaŵa mu jele, ndipo nkhawamo kuti mazgu agha ngaunenesko nadi. Palije chiyezgo icho chikanipatura ku chitemwa cha Yehova. Yehova wakanovwira kuti nilutilire kuŵa na chipulikano chakukhora.”

Chiyelezgero chiwemi cha Jovidon chakhozga chomene ŵapapi ŵake. Adada ŵake, a Abdujamol, ŵakuti: “Malurombo kweniso chiyelezgero chiwemi cha mwana withu uyo wakalutilira kugomezgeka kwa Yehova pa nyengo yakusuzga iyi, vyakhozga chomene chipulikano chithu. Ŵabali na ŵadumbu kuzingilira pa charu chose chapasi nawo ŵakatovwira. Tikuwonga chomene malurombo ghawo. Tikuwonga chomene Yehova chifukwa cha kutipa ŵabwezi ŵawemi nthena awo ŵakutitemwa zanadi.”

Mu nyengo zaumaliro izi, tose tikukhazga kuti tisanganenge na “viyezgo ivyo vili nga ni moto.” (1 Petrosi 4:12) Lekani Jovidon wakamalizga na mazgu ghakuti: “Pakuti sono ndine mwanangwa, nkhukhumba kugwiliskira ntchito nyengo iyi pa kusambira vinandi vya Yehova mwakuti ninozgekere makora viyezgo ivyo vikwiza kunthazi. Kwa mose imwe mundasanganepo na viyezgo vyakofya, mungachita makora kuti mugwiliskirenge ntchito nyengo iyi pa kusambira vinandi vya kukhwaskana na Yehova kuti mumumanye makora. Mungachita nthena para mukuŵazga Mazgu ghake kweniso mabuku ghithu ghakulongosora Baibolo.”