Pa December 14, 2021, Wupu wa United Nations Human Rights Committee ukeruzga kuti charu cha Tajikistan chikaswa wanangwa wa Mubale Tierri Amedzro mwakumukaka na kumutumizga ku Kazakhstan.

Wupu uwu ukati mubali uyu wakakakika “pa vifukwa vyambura kupulikikwa” ndipo kuchita nthena nkhuswa fundo za wupu wa UN International Covenant of Civil and Political Rights. Wupu uwu ukatiso boma lilije mazaza ghakumukanizgira Tierri kuwelera ku Tajikistan para mwenecho wakukhumba. Ŵalara ŵa boma la Tajikistan pasono “ŵali na ntchito yakuwoneseska kuti vyose ivyo vikukhumbikwa vyachitika mwakuti vinthu vyanthena vizakaleke kuchitikaso kunthazi.”

Ŵalara wa boma la Tajikistan ŵakasecha nyumba iyo Ŵakaboni ŵa Yehova ŵakachitirangamo maungano ghawo pa October 4, 2018. Ŵamazaza ŵakaka Tierri na kukamufumba mafumbo ku ofesi yikuru ya Tajikistan State Committee on National Security. Pa October 16, 2018, mweruzgi wakati Tierri wali na mulandu wakukhala mu charu cha Tajikistan kwambura kuzomerezgeka. Tierri ni mwenekaya wa ku Russia, uyo wakagwiranga ntchito ku Tajikistan.

Mweruzgi wakamulipiska Tierri na kuyowoya kuti ŵamulutiske ku charu chake mwaluŵiro.

Tierri wakuti: “Nkhugomezga kuti ivyo wupu wa UN committee wadumura viwovwirengeko kuti wanangwa wa chisopa uŵeko makora ku Tajikistan, mwakuti ŵabali ŵithu ŵasopenge Yehova mwamtende.”

Pasono ku Tajikistan kuli mubali yumoza uyo wali mu jele chifukwa cha chipulikano chake.

Tili na chigomezgo chose kuti Yehova waŵapenge mtende wambura kumara awo ŵakuzizipizga viyezgo.—Yesaya 26:3.