Pa February 24, 2021, Mulara wa wupu wa USCIRF a Nury Turkel wakapharazga kuti wachitengepo kanthu kuti m’paka Mubali Shamil Khakimov uyo wali na vyaka 70, wafumiskike mu jele kuyana na malango gha wupu wakuwona vya awo ŵajalirika mu jele chifukwa cha chipulikano chawo. Mu chipharazgo ichi, Turkel wakalongosora kuti: “Chifukwa waka cha chilango chambura urunji icho wakapika cha vyaka 7 na hafu, kufuma waka mu 2019, mwanalume uyu, uyo ni muchekuru ndipo wakulwaralwara, wakutambura mu jele ilo muli ŵanthu ŵanandi kweniso ndakale. Chilango ichi chikuŵika pangozi umoyo wa mwanalume uyu, nakutiso wali kujalirika mu jele kwambura vifukwa vyakupulikikwa chifukwa iyo wakachitanga waka vinthu vyakukhwaskana na kusopa mwamtende pakuŵa Kaboni wa Yehova.”

Mubali Khakimov, muwoli wake wali kufwa ndipo njumoza mwa Ŵakaboni 24 ŵa ku chigaŵa cha kumpoto kwa Tajikistan awo ŵakafumbika mafumbo na ŵamazaza ŵa Department of Organized Crime Control (DOCC) mu January na February 2019. Ŵamazaza aŵa ŵakamukaka Mubali Khakimov na kumufumba vyakukhwaskana na umo gulu la Ŵakaboni ŵa Yehova likwendeskekera kweniso umo iyo wakaŵira Kaboni wa Yehova.

Mubali Khakimov ŵakamusunga kwa maora 8 ndipo ŵakamukanira kuti wakawonane na ŵa vyachipatala pa wovwiri uwo wakakhumbikwanga chifukwa wakaŵa kuti ŵamuchita waka mwasonosono opareshoni. Mubali uyu waliso na BP. Apo ŵapolisi ŵakalutanga nayo ku nyumba kwake, ŵakamupoka vinthu nga ni foni, tabuleti, Baibolo, mabuku ghithu ghakusambilira Baibolo, na pasipoti. Kwambura pasipoti, Mubali Khakimov wakatondekanga kuti wapokere ndalama zake za penshoni izo zikamovwiranga kuti wasange wovwiri wa chipatala.

Pa February 28, 2019, mweruzgi wa ku Khoti la mu Msumba wa Khujand wakadumura kuti Mubali Khakimov ŵamusunge mu jele. Nyengo iyo ŵakamusungiranga mu jele ŵakasazgirako maulendo ghatatu. Ŵakamusunga mu jele nyengo iyo ŵakafufuzanga mulandu wake kweniso apo wakawonekeranga mu khoti.

Pa September 10, 2019, ŵakati wali na mulandu ndipo wakagwire jele vyaka 7 na hafu. Ndipouli, pa July 4, 2020, ŵalaraŵalara ŵa jele ŵakaphalira Mubali Khakimov kuti vyaka ivyo wakapika vikhirengeko na vyaka viŵiri, myezi yitatu na mazuŵa 10 kuyana na dango la ku Tajikistan. Pasono deti ilo wazamufumira mu jele kuyana na vyaka ivyo vyakhalako ni May 16, 2024.

Tikumanya kuti Yehova walutilirenge kovwira ŵabali na ŵadumbu ŵithu kuti ŵazizipizge mwachimwemwe kweniso mwakuzikira.—Salimo 20:2.