Mulimo wakuzenga na kunozgaso ofesi ya munthavi ya Thailand ukamba mu 2019 na ŵanthu ŵakujipeleka waka ŵa mu charu chenechichi kweniso ŵakufuma mu vyaru vinyake. Kweni muliri wa COVID-19 wati wamba waka, pafupifupi ŵanthu wose ŵa mu vyaru vinyake awo ŵakapukwa mulimo uwu, ŵakawelera dankha mu vyaru vyawo. Vinthu vinyake ivyo vikayimiskika chifukwa cha COVID-19 vyati vyambiraso, mulimo wakuzenga nawo ukambiraso. Ŵanthu ŵanyake ŵakachemeka kuti ŵazakasambizgike milimo yinyake na kulutilizga mulimo uwu mpaka kuwumaliro. Chigaŵa chaumaliro cha ntchito iyi chikamalizgika pa April 30, 2023.

Mubali Setthasat Tawansirikul na muwoli wake, Waraporn ŵakaŵa ŵamoza mwa ŵanthu awo ŵakajipeleka. Pakwamba ŵakafipanga mtima chifukwa ŵakamanyanga vinandi yayi vya ntchito yakuzenga. Setthasat wakayowoya kuti: “Panyengo iyo tikaŵa kura, ŵakatisambizga vinandi.”

Chimwemwe icho ŵabali na ŵadumbu ŵakasanga chifukwa cha kujipeleka kuchitako mulimo uwu, chikawovwiraso ŵanji kuti ŵajipeleke kuchitako mauteŵeti ghakupambanapambana. Ŵanyake pasono ŵakuchita mulimo wa vyakuzenga mu charu ichi cha Thailand. Mudumbu munyake wali kunjira Sukulu ya Ŵapharazgi ŵa Ufumu. Ŵanyake ŵakuteŵetera pa Beteli. Mubali Rapeepat Woradetsakul uyo njumoza mwa ŵanthu awo wamba sono kuteŵera pa Beteli wakayowoya kuti: “Kuwona umo Yehova wakanovwilira pa nyengo iyo mulimo wakuzenga ukaŵa mukati, kwanipa chikanga icho nkhakhumbikwiranga kuti ningafiska kuteŵetera pa Beteli. Nili na chigomezgo chose kuti Yehova wanovwirenge pa uteŵeti wane uphya uwu.”

Mulimo wakuzenga uwo ukachitikanga pa ofesi ya munthavi ya Thailand, ukasazgangapo kunozga malo ghakukhalako, maofesi, kuzenga nyumba ziphya zakusungamo vinthu kweniso kuzenga malo ghaphya ghakwimikapo magalimoto. Mwakusazgirapo apa, pakagulika nyumba zinyake izo zikaŵa pafupi na ofesi ya munthavi ndipo zikanozgeka kuti mukhalenge ŵanthu awo ŵakuteŵetera pa Beteli.

Ndise ŵakukondwa chomene kuti ŵabali na ŵadumbu ŵithu ku Thailand ŵakajipeleka na mtima wose kuteŵetera Yehova ndipo ŵajiwonera ŵekha kufiskika kwa mazgu agho ghakusangika pa Salimo 34:8 apo pakuti: “Chetani mwe, muwone kuti Yehova ni muwemi.