Pa 28 March m’paka 8 April, 2024 mutawuni ya Bangkok ku Thailand kukachitika chiwoneskero cha mabuku cha nambara 22. Chiwoneskero ichi chikachitikira ku Queen Sirikit National Convention Center ndipo kukaŵa ŵanthu pafupifupi 2 miliyoni. Ŵabali ŵakanozga malo agho ŵakaŵikamo mabuku agho ghali na ulongozgi wakovwira wa mu malemba uwo ungawovwira ŵanthu kuti ŵaleke kusuzgika chomene maghanoghano kweniso umo ŵangamalirana na masuzgo agha. Ŵabali na ŵadumbu ŵakaŵikapo mtima kuti ŵambiske chidumbirano na ŵanthu ŵanandi, ndipo ŵanthu 34 ŵakapempha kuti ŵasambirenge Baibolo.

Panyengo yinyake ŵakadumbiskananga na mwanalume uyo wakayowoya kuti mwana wake msungwana wakusuzgika chomene maghanoghano. Ŵabali ŵakadumbiskana nayo fundo zinandi za mu Malemba izo zikusangika mu Gongwe la Mulinda la Na. 1 2023 la mutu wakuti, “Umo Baibolo Lingawovwilira Awo Ŵakusuzgika Maghanoghano.” Ŵabali ŵakawovwiraso munthu uyu umo wangasangira nkhani zinyake pa jw.org zakukhwaskana na umo wangaŵira na mbumba yakukondwa. Iyo wakakondwa chomene na ulongozgi uwemi wa mu Malemba, mwakuti nyengo yeneyiyo wakaŵa wakukhumbisiska kumulongora mwana wake mwanakazi ulongozgi uwu.

Munthu munyake uyo wali na udindo ukuru mu boma wakiza pa malo apo tikaŵika mabuku ghithu ndipo wakadumbiskana na mubali kwa nyengo yitali. Wati wamulongora mavidiyo ghanandi pa jw.org, munthu uyu wakafumba vyakukhwaskana na Ŵakaboni ŵa Yehova kweniso umo mulimo withu wakusambizga ŵanthu Baibolo ukwendera. Wati wawona mazgu ghakuti sambirani Baibolo kwaulere, wakafumba kuti, “Kasi mukusambira wuli Baibolo na ŵanthu?” Mubali wakamulongora burosha lakuti Mungakondwa na Umoyo Kwamuyirayira na kumuphalira mwakudumura umo tikusambilira Baibolo mwakuchita kudumbiskana. Ŵabali wakapangana nayo kuti ŵazakadumbiskaneso nyengo yinyake.

Mudumbu wati walongora mwanakazi munyake webusayiti yithu na kumuphalira mwakudumura umo mulimo withu wakupharazga ukwendera, mwanakazi uyu wakafumba kuti: “Kasi ni vichi vinyake ivyo Ŵakaboni ŵa Yehova ŵakuchita?” Mudumbu wakalongora mwanakazi uyu vidiyo ya mutu wakuti, Kasi pa Nyumba ya Ufumu Pakuchitika Vichi? Ndipo mwanakazi uyu wakawonelera vidiyo iyi mwakunweka. Pamanyuma wakayowoya kuti: “Vikuwoneka kuti ku maungano ghinu ŵanthu ŵake mbalusungu kweniso ŵaubwezi, ningatemwa kuzakizako.” Sabata yakulondezgapo mwanakazi uyu wakenda mtunda wa maora pafupifupi ghaŵiri kuti wakasangikepo pa maungano.

Tikuwonga chomene kuwona kuti ŵabali na ŵadumbu ŵithu ku Bangkok ŵakagwiliskira ntchito nyengo yawo kuti ŵawovwire ŵanthu ŵanyake kumanya “mtende wa Chiuta uwo ukuluska maghanoghano ghose.”—Ŵafilipi 4:7.