Pa January 1, 2022, Gongwe la Mulinda likaŵa kuti lakwaniska vyaka 75 kufuma apo likamba kung’anamulikira mu Chithai.

Makani ghawemi ghakafika ku Thailand mu 1931. Mu nyengo iyo ŵabali ŵakagaŵiranga mabuku ghanandi gha mu Chitchayinizi, Chingelezi, na mu Chijapanizi. Apa kachikwama kakovwira kuti ghaleke kunangika ndiko kekha kakang’anamulika mu Chithai.

Ŵabali ŵapayiniya ŵatatu awo ŵakaŵa ŵa mu charu chinyake ndiwo ŵakawamo fundo yakuti ŵangafika ŵanthu pamtima pekha para ŵangaŵa na mabuku ghanandi mu chiyowoyero cha Chithai. Mubali Willi Unglaube wakalembera Mubali Rutherford kumupempha wovwiri. Mubali Rutherford wakazgora kuti: “Uŵe na chipulikano mwa Yehova na kuŵikapo mtima, umusangenge munthu wakuchita mulimo wakung’anamura.”

Mu December 1939, Mubali Kurt Gruber na Willi Unglaube ŵakapharazganga kumpoto kwa Thailand. Chomchai Inthaphan, uyo wakaŵa msambizgi mulara pa sukulu ya Presbyterian Girls mu Chiang Mai, wakaŵazgapo buku lithu mu Chingelezi ilo ŵabali ŵakagaŵiranga. Chomchai, uyo wakachimanyanga makora Chingelezi na Chithai, wakamanya kuti wasanga unenesko.

Mwaluŵiro Chomchai wakafuma mu tchalitchi lake kweniso wakaleka kusambizga pa sukulu iyi, nangauli pa sukulu ŵakamususkanga na kumunyengelera kuti ŵamusazgirengeko malipiro, kweni iyo wakabatizika na kuŵa Kaboni wa Yehova. Mulimo wakwamba uwo wakapika ukaŵa wakung’anamura buku la Salvation. Pamanyuma Chomchai wakaŵa yumoza mwa ŵanthu ŵakwamba mu mbumba ya Beteli ku Bangkok, uko wakateŵetera vyaka vinandi kuchita mulimo wakung’anamura mu Chithai. Pakatora nyengo yayi, mbwenu ŵanakazi ŵanandi ŵakazomera unenesko ndipo wakaŵa ŵakwenelera kuchita mulimo wakung’anamura.

Nkhondo Yachiŵiri ya Pa Charu Chose yati yamba, mulimo wakung’anamura mu Chithai ukayima, kweni ukambaso mwaluŵiro chomene nkhondo yati yamara. Gongwe la Mulinda la January 1947 likang’anamulika mu Chithai, ndipo pakapangika magazini ghanyake 200 mwakugwiliskira ntchito mashini ghakupangira mabuku zina lake mimeograph. Ŵakalutilira kupanga mabuku munthowa iyi mpaka mu 1952, apa ndikuti magazini gha Gongwe la Mulinda ghakapangikanga 500 mwezi uliwose. Kufuma apo ŵabali ŵakamba kuchita kupulintiska magazini. Mu September 1993, ofesi ya munthavi ya Japan yikamba kupulinta magazini gha Gongwe la Mulinda na Wukani! agho ghakatumizgikanga pa charu chose.

Pasono, ŵabali na ŵadumbu 80 awo ŵali ku ofesi ya munthavi ya Thailand kweniso awo ŵali ku maofesi ghaŵiri ghakung’anamulirako mabuku ŵakovwirapo pa mulimo wakung’anamura. Padera pa chiyowoyero cha Chithai, Gongwe la Mulinda likung’anamulikaso mu Chiakha, Chilahu, Chilaotian, na mu Chiyowoyero cha Mawoko cha Chithai.

Ŵapharazgi ŵakujumpha 5,000 awo ŵali mu chigaŵa cha ofesi ya munthavi ya Thailand ŵakuwonga chomene Yehova chifukwa chakuŵa na Gongwe la Mulinda mu chiyowoyero chawo.—Zintharika 10:22.