Pa March 12, 2023, Mubali Wilfrid Sohinto, uyo ngwa mu Komiti ya Munthavi ku Benin wakafumiska Baibolo la Malemba Ghakupatulika mu Mang’anamuliro gha Charu Chiphya mu chiyowoyero cha Chikabiye. Wakapharazga vya kufumiska Baibolo ili pa ungano uwo ukachitikira ku Kara, Togo. Ndipo ŵanthu ŵakujumpha 2,959 ŵakawungana. a Nyengo yeneyiyo lati lafuma waka, awo ŵakawungana ŵakapokera Baibolo lakuchita kupulinta ili. Kweniso la pa Intaneti likamba kusangika kuti ŵambe kuchita dawunilodi.

Chikabiye chikuyowoyeka chomene na awo ŵakukhala kumpoto kwa Togo. Kweniso chikuyowoyeka na ŵanthu awo ŵakukhala mu vyaru vyapafupi na Benin kweniso Ghana. Ndipo ŵanthu pafupifupi 1 miliyoni ŵakuyowoya chiyowoyero ichi.

Mabaibolo ghanyake ghakusangika mu Chikabiye kweni Baibolo la Malemba Ghakupatulika mu Mang’anamuliro gha Charu Chiphya ndakwamba kugwiliskira ntchito zina la Chiuta mose umo likwenera kuŵamo. Kweni Baibolo limoza pera la chiyowoyero cha Chikabiye ndilo lili na zina la Chiuta, ndipo likusangika pamoza pera pa Ekisodo 3:15.

Pakuyowoya vya kufumiskika kwa Baibolo liphya ili, yumoza uyo wakang’anamurako wakati: “Ntchakuwonekerathu kuti Yehova wakawovwira chomene pa mulimo wakung’anamura mwakuti nase tiŵe na Baibolo. Litovwirenge chomene para tikupharazga, kweniso ntchakukondweska kuti tiligwiliskirenge ntchito pa maungano gha mpingo.”

Tikukondwa nawo lumoza ŵabali ŵithu awo ŵakuyowoya Chikabiye chifukwa cha kuŵa na chawanangwa chapadera ichi, icho chiŵawovwirenge ‘kulumba zina la Yehova.’—Salimo 135:1.