Pa August 6, 2020, khoti ku Turkmenistan likeruzga kuti Mubali Eldor na Sanjarbek Saburov ŵakagwire jele vyaka viŵiri, chifukwa chakuti njuŵi yawo yikuŵazomerezga yayi kunjira usilikari. Ŵabali aŵa awo mpha ukuru na unung’una, munyake ngwa vyaka 21 apo munyake ngwa vyaka 25. Khoti lakana kuti ŵabali ŵithu aŵa ŵachite apilu. Aka nkhachiŵiri kuti ŵabali aŵa ŵakakike chifukwa chakuleka kunjilirapo pa vya charu.

Mu 2016, Mubali Sanjarbek Saburov wakakana mwantchindi kunjira usilikari. Ntheura, ŵakati wali na mulandu ndipo ŵakati ŵamuwonelerengepo dankha usange walongerenge nkharo yiwemi kwa vyaka viŵiri.

Chaka chakulondezgapo, munung’una wa Sanjarbek, Eldor, nayo wakakana kuchitako ntchito za usilikari. Ŵakadumura kuti wakagwire ntchito yinonono vyaka viŵiri ndipo Boma litorengeko 20 peresenti pa malipiro ghake.

Kuyana na dango la ku Turkmenistan, munthu uyo wakana usilikari chifukwa cha njuŵi yake wangakakikaso kachiŵiri usange wakulutilira kukana usilikari. Mu April 2020, ŵabali aŵa ŵakachemekaso kuti ŵakanjire usilikari. Wose ŵaŵiri ŵakakana kunjira usilikari. Ŵakati ŵali na mulandu, ntheura ŵakagwire jele.

Ŵapapi ŵa ŵabali aŵa ŵali na chitima chifukwa ŵana ŵawo ŵajalirika mu jele kweniso pasono ŵasoŵenge pakukora. Adada ŵawo ŵakulwara msana, ndipo ivi vikupangiska kuti ŵasuzgikirenge pakugwira ntchito. Ŵanyamata aŵa ndiwo ŵakawovwiranga pa nyumba, ŵakalimanga thonje. Sono ŵali mu jele, icho chikulongora kuti ŵapapi ŵawo ŵalijeso kwakuti ŵangasanga wovwiri wa ndalama. M’malo mwake, sono ŵapapi ndiwo ŵapenjenge vyakukhumbikwira vya ŵana ŵawo ku jele.

Boma la Turkmenistan likupeleka yayi mwaŵi wakuti munthu uyo wakana usilikari wakagwire ntchito zinyake. Ntheura, ŵabali ŵachinyamata awo ŵakukana usilikari chifukwa cha njuŵi yawo ŵangajalirika mu jele chaka chimoza m’paka vyaka vinayi. Ŵanyamata ŵaŵiri aŵa mbamoza ŵa Ŵakaboni 10 ŵachinyamata awo ŵali mu jele ku Turkmenistan chifukwa cha kuleka kunjilirapo pa vya charu.

Tikumanya kuti Yehova waŵatumbikenge ŵabali ŵithu ŵachinyamata ŵa ku Turkmenistan chifukwa cha chikanga chawo. Mphanyi waliyose wa iwo wakumbuka ivyo Yehova wakalayizga Themba Asa, kuti: “Imwe, muŵe ŵankhongono, mungathikanga lusoko yayi, chifukwa mupokerenge njombe pa mulimo winu.”—2 Midauko 15:7.