Pa January 18, 2021, khoti linyake ku Turkmenistan likadumura kuti Mubali Artur Yangibayev wakagwire jele vyaka viŵiri chifukwa chakukana kunjira usilikari chifukwa cha njuŵi yake. Aka nkhachiŵiri kuti Mubali Artur Yangibayev wapike mulandu wakuyana waka chifukwa chakukana kunjira usilikari.

Artur Yangibayev

• Chaka chakubabikira: 1997 (ku Seydi)

• Mbiri yake: Apo Mubali Artur wakaŵa mwana wakasangana na masuzgo ghanandi, ndipo ivi vikapangiska kuti wajifumbenge kuti chifukwa wuli mu charu mulije urunji? Iyo wakadumbiskana fumbo ili na mudumbu wake uyo ni Kaboni wa Yehova. Ndipo apo wakaŵa na vyaka 13, wakamba kusambira Baibolo. Pamanyuma wakabatizika mu 2014

  Wakugwira ntchito ya vyakuzengazenga, na kunozga nyumba izo zanangika. Ŵapapi ŵa Mubali Artur ŵakuti Artur ngwalusungu kweniso wakuŵawovwira chomene. Ndipo ŵanthu mu chikaya ŵakumuchindika chomene chifukwa chakuti ni munyamata wakugomezgeka

Pa August 8, 2016, Mubali Artur ŵakamujalira mu jele chifukwa chakukana kunjira usilikari chifukwa cha njuŵi yake. Ndipo pa August 30, ŵakadumura kuti wakagwire jele vyaka viŵiri. Mu September 2018, Mubali Artur wakamalizga kugwira jele vyaka ivyo wakapika.

Pa December 15, 2020, Mubali Artur wakachemekaso kuti wakanjire usilikari. Pamanyuma wakafumbika mafumbo na wakwimira boma pa milandu ndipo wakamuphalira kuti walembe ivyo wakugomezga kweniso chifukwa icho wakukanira kunjira usilikari.

Pa December 30, wakwimira boma pa milandu wakaphalira Mubali Artur kuti ŵamusanga na mulandu. Kweniso ŵalara ŵa boma ŵakamuphanga pasipoti yake.

Pamanyuma pakuti wagwira jele ulendo wakwamba, Mubali Artur wakati: “Lemba la Ŵaroma 8:37-39 likanikhozga chomene kuti palije uyo wanganilekeska kulutilira kuŵa wakugomezgeka kwa Yehova.” Tikumanya kuti na wovwiri wa Yehova, Mubali Artur nayo wazizipizge chiyezgo ichi.