Pa January 19, 2021, khoti linyake ku Turkmenistan likadumura kuti Mubali Veniamin Gendjiyev wakagwire jele vyaka viŵiri chifukwa chakukana kunjira usilikari chifukwa cha njuŵi yake.

Veniamin Gendjiyev

• Chaka cha kubabikira: 2000 (ku Seydi)

• Mbiri yake: Walelekera mu banja la Ŵakaboni ŵa Yehova. Wakaŵa mupharazgi apo wakaŵa na vyaka 15. Ndipo wakabatizika apo wakaŵa na vyaka 19. Wakumanyikwa kuti ngwakuzika na wakuchezgeka

  Wakasambizgika umakanika. Wakutemwa kulizga gitara. Ŵanyake ku sukulu ŵakamusekanga chifukwa cha ivyo wakugomezga. Kweni wakasambira umo wangavikililira fundo za mu Baibolo izo wakugomezga

Mu July 2018, Mubali Veniamin wakeruzgika kuti wakagwire jele chaka chimoza chifukwa chakukana kunjira usilikari chifukwa cha njuŵi yake. Ndipo wakafumiskika mu jele pa June 25, 2019.

Pa December 25, 2020, wakachemeka ku ofesi ya wakwimira boma pa milandu ya mu boma la Dyanev. Ŵalara ŵa boma ŵakamuphalira kuti walembe kalata yakulongosora chifukwa icho wakukanira kunjira usilikari. Pa December 30, 2020, wakwimira boma pa milandu wakaphalira Mubali Veniamin kuti ŵamusangaso na mulandu. Ŵakamupokaso pasipoti yake.

Mubali Veniamin wakukumbuka umo vinthu vikaŵira ŵati ŵamujalira mu jele ulendo wakwamba, iyo wakuti: “Nkhuwona kuti Yehova wakanovwiranga. Wakanipa nkhongono za kuzizipizgira, ndipo chipulikano chane chikakhora chomene. Nkhalombanga kwa Yehova kweniso nkhaphalirangako ŵanyane mu jele uthenga uwemi, kuchita nthena kukanikhozganga chomene.

“Apo nkhaŵa mu jele, ŵapapi ŵane ŵakanipanga monire kufuma ku awo ŵakaŵa kuti ŵangafiska yayi kuzakaniwona. Ivi vikanovwira kuzizipizga m’paka apo nkhafumira mu jele.”

Lemba ilo likamukhozga chomene Mubali Veniamin ni Yesaya 54:17. Chigaŵa chinyake cha lemba ili chikuti: “Palije chilwero icho chapangikira iwe icho chitondenge.” Malemba nga agha, kweniso malurombo ghithu, vingawovwira Mubali Veniamin kuzizipizga chiyezgo ichi.